Pfizer ножўя таъсирлар туфайли семиришга қарши дори ишлаб чиқишни тўхтатади

Фармацевтика компанияси Pfizer семиришга қарши Danuglipron дори воситасини ишлаб чиқишни тўхтатади. Бунга клиник синовларда иштирок этган бир беморда жигар билан боғлиқ жиддий ножўя таъсирлар аниқлангани сабаб бўлмоқда.

«Pfizer инвесторлар катта қизиқиш билан кузатаётган семиришга қарши дори воситаси устидаги ишларни тўхтатади. Бу компаниянинг вазн камайтирувчи дори воситалари бозоридаги етакчилар — Novo Nordisk ва Эли Lilly & Co билан рақобат қилиш ҳаракатларига жиддий зарба бўлади», — дейилади хабарда.

Қайд этилишича, дори воситасини синовдан олиш қарори бир иштирокчида аниқланган эҳтимолий жигар шикастланишлари билан боғлиқ. Шу сабабли Pfizer дори воситасининг сўнгги босқичдаги синовларини ўтказмайди ва ўз эътиборини семиришни эрта босқичда даволашга қаратилган инвестицияларга йўналтиради.

Bloombergʼнинг қайд этишича, Pfizer COVID-19 вакцинасини яратгач, семиришга қарши дорилар бозорида рақобатни ўзининг устувор йўналишларидан бирига айлантирган. Коронавирусга қарши вакцина ва даво воситаларига талаб пасаяётган бир пайтда, вазн йўқотиш воситалари бозори ривожланишда давом этмоқда ва 2030 йилга бориб 130 миллиард долларга етиши кутиляпти.