ТИҚХММИ Миллий тадқиқот университетининг QS халқаро рейтингдаги кўрсаткичи янада мустаҳкамланди

Фото: ТИҚХММИ Миллий тадқиқот университети

Ўзбекистон Республикаси Президентининг 2021 йил 10 декабрдаги «Иқтисодиёт тармоқлари учун муҳандис кадрларни тайёрлаш тизимини инновация ва рақамлаштириш асосида тубдан такомиллаштириш чора-тадбирлари» тўғрисидаги қарорида ТИҚХММИ Миллий тадқиқот университетини трансформация қилиш ва комплекс ривожлантириш дастурини амалга ошириш ҳамда 2025 йилга қадар халқаро тан олинган ташкилотларнинг олий таълим муассасалари рейтингида биринчи 1000 талик рўйхатга киритиш вазифалари белгиланган.

Бу борада 2021 йилнинг 15 декабрь куни QS халқаро рейтинг агентлигининг «Ривожланаётган Европа ва Марказий Осиё давлатлари олий таълим муассасаларининг (QS World University Rankings: Emerging Europe and Central Asia)” 2022 йилги рейтинги эълон қилинди.

Унда Ўзбекистон тарихида биринчи бўлиб рейтингга кирган ТИҚХММИ Миллий тадқиқот университети 2021 йилги рейтингда 271 ўрин эгаллаган бўлса, 2022 йилги рейтингда 60 поғона юқорилаб, 211-ўринда қайд этилди.

Қувонарлиси шундаги, ТИҚХММИ Миллий тадқиқот университети халқаро рейтинг кўрсаткичларини йилдан йилга ошириб бормоқда, яъни 2020 йилда 334-ўринда, 2021 йилда 271-ўринда ва 2022 йилги рейтингда 211-ўринни қайд қилиб, QS World University Ranking ЕЕСА’нинг 47 фоизлик энг илғор университетлари қаторидан жой олди.