Қўшимча функционаллар
-
Тунги кўриниш
Россия 400 нафар мигрантнинг мамлакатга киришини 40 йилга тақиқлади
400 нафарга яқин мигрантнинг Москвадаги муштлашувлар ва бошқа қонунбузарликлар учун Россияга кириши 40 йилга тақиқланди. Бу ҳақда журналистларга Россия ИИВнинг Миграция масалалари бўйича бош бошқармасининг Москва бўйича қочқинлар, вақтинчалик бошпана берилганлар ва кўчирилганлар билан ишлаш бўлими бошлиғи Татяна Дмитриева маълум қилди.
«Мигрантларнинг номақбул хулқ-атвори - муштлашувлар, бошқа рухсат этилмаган тадбирлар ҳақидаги масала кўтарилди. Айтишим мумкинки, Москвада бундай тадбирларда қатнашган 400 нафарга яқин шахсга нисбатан маъмурий чоралар кўрилди. Уларнинг Россияга кириши 40 йилга тақиқланди. Амалда улар ҳеч қачон Россияга кира олмайди», деди у 18 декабрда нишонланадиган Халқаро мигрантлар кунига бағишланган давра суҳбатида.
Дмитриеванинг қўшимча қилишича, ҳозирда Москвада 1,33 миллион мигрант бор, бу ўтган йилга нисбатан 30 фоизга кўп. Шу билан бирга, бу миқдорий кўрсаткичлар 3-4 йил олдингига қараганда анча кам. Унинг сўзларига кўра, бу, эҳтимол, миграция оқимининг ўзи камайиб бораётганидан, чет эл фуқаролари келаётган мамлакатларда иш ўринлари пайдо бўлаётганидан далолат беради.
«Мигрантларнинг қарийб 82 фоизи меҳнат фаолиятини амалга ошириш учун бизнинг давлатга келмоқда», — дея қўшимча қилди Дмитриева ва гап асосан Ўзбекистон, Тожикистон ва Қирғизистон фуқаролари ҳақида кетаётганини таъкидлади.
