Қарши шаҳар ҳокимлиги тадбиркорнинг ноқонуний бузилган объекти учун компенсация тўлаб беради

Суд қарорига кўра, Қарши шаҳар ҳокимлиги тадбиркорнинг ноқонуний бузилган объекти учун компенсация тўлаб беради. Бу ҳақда Бизнес омбудсман хабар бермоқда.

Хабарда маълум қилинишича, “Construction” ХК (номи ўзгартирилган) Қарши шаҳар ҳокимлигининг ҳаракатларидан норози бўлиб, Бизнес омбудсманга мурожаат қилган.

Бизнес омбудсманнинг Қашқадарёдаги вакили томонидан ўтказилган суриштирувда аниқланишича, Қарши шаҳар ҳокимининг қарори билан тадбиркорга автомобиллар қатнов йўлида жойлашган ҳудуддан автобус бекати қуриш учун ер майдони ажратилган.

Аммо кейинчалик мазкур йўл кенгайиши натижасида ер участкаси давлат ва жамоат эҳтиёжлари учун олиб қўйилиши муносабати билан автобус бекати ҳокимнинг тегишли қарорисиз ноқонуний равишда бузилган.

Ноқонуний бузилган автобус бекати ер майдони билан 312,5 миллион сўм қийматга баҳоланган.

Қайд этилишича, Бизнес омбудсманнинг Қарши туманлараро иқтисодий судига киритилган даъво аризаси натижасида, “Construction” ХК фойдасига Қарши шаҳар ҳокимлиги ҳисобидан 312,5 миллион сўмлик компенсация ундирилиши белгиланган.