Фермерларнинг ҳикоя қилиб беришича, «Ғаллаорол туман» сув истеъмолчилари уюшмаси корхонаси улардан дала майдонларини суғориш учун ноқонуний ҳақ ундирмоқда. Фермерлар солиқлар қаторида сув учун солиқ тўлаб келишаётганини таъкидлашмоқда.
«СИУ билан шартнома имзолаган фермерларнинг барчаси судга берилган. Суд 8тадан гуруҳ қилиб ажратиб иш кўрмоқда. Биз ўзимизнинг барча ҳужжатларимизни судга тақдим этдик. 2021 йилда биз билан шартнома тузилмаган бўлса-да, устимиздан иш қўзғатиб, судга беришган», — дейди «Янгиобод бахт гулшани» фермер хўжалиги раиси Раҳмон Ҳожиев.
«Бугун (11 январ) учинчи марта суд қолдирилмоқда. Кейинги суд мажлиси 18 январ куни бўлиб ўтиши белгиланди. Ҳар гектарига 100 минг сўмдан белгиланган нархни асослантириб бера олишмади», — дейди «Шерқангли шарбатлари» фермер хўжалиги раиси Фурқат Жониқулов.
Яъни фермерлар нодавлат ва нотижорат ташкилот ҳисобланувчи «Ғаллаорол туман» сув истеъмолчилари уюшмаси улардан гектарига йилига 100 минг сўмдан ҳисоблаб сув ҳақи ундираётганидан норози.
Чунки ташкилот сувни ўз вақтида етказиб бериш, ариқ, канал ва зовурларни тозалаш борасида бирор иш қилган эмас. Фермерларнинг ўзлари бу ишларни маблағ сарфлаб бажариб келишмоқда.
«5 гектар ерим бор. Сабзавот маҳсулотлари етиштираман. Сувдан фойдаланаман, тўғри. Лекин солиқлар қаторида сув учун ҳам тўлов қиламан-ку? Сел мавсумида дарёни уриб кетса, ўзимиз трактор ёллаб тозалаб чиқамиз. Етмаганига аҳолидан пул йиғиб чиқамиз. Булар бир иш қилиб бермасдан, пул ундириш учун судга бергани алам қиляпти», — дейди «Иззатулло Аминбек» фермер хўжалиги раиси Холмат Ўрозбоев.
Фермерлар СИУ 2020 йил бошида тузилган бўлса-да, 2019 йилда фойдаланилган сув учун тўлов ундиришга ҳаракат қилаётганидан ҳам норози.
