Тошкент ИЭС фаолияти қисман тикланди

Фото: Энергетика вазирлиги

Тошкент иссиқлик электр станциясининг 7 та энергоблокидан 5 таси барқарор фаолият юритишни бошлади.

Энергетика вазирлиги хабарида қайд этилишича, мамлакатнинг барча ҳудудларида, хусусан, пойтахт ва унинг атрофида электр таъминоти босқичма-босқич тикланган. Электр тармоқлари ва подстанциялар орқали истеъмолчиларга электр энергияси етказиб берилмоқда.

«Мисол учун, электр таъминотида йирик носозлик кузатилгунга қадар Тошкент иссиқлик электр станциясининг 7 та энергоблоги ишлаб турган эди. Айни пайтда эса созлаш-тиклаш ишлари олиб борилиб, уларнинг 5 таси барқарор иш фаолиятига келтирилди», — дейилади хабарда.