30 дан ортиқ тотализатор ва букмекерлик фаолиятига алоқадор сайтга кириш чеклаб қўйилган

Ўзбекистонда тотализатор ва букмекерлик фаолиятини амалга ошириш ва бундай хизматларни реклама қилиш қонунан тақиқланади.

Фото: Kun.uz

АОКАда ўтказилган брифингда Истеъмолчилар ҳуқуқларини ҳимоя қилиш агентлиги матбуот котиби Моҳрухсор Тоғаева ўтган йилдаги реклама қонунчилиги бузилган ҳолатлар бўйича маълумот берди.

Қайд этилишича, ноқонуний рекламаларнинг олдини олиш мақсадида 2021йилда 27 мингга яқин ўрганишлар ўтказилган бўлиб, шундан 15 минг 486 ҳолатда турли камчиликлар аниқланган.

Бугунги кунда республикада тотализатор ва букмекерлик фаолиятини амалга ошириш ва албатта, бундай хизматларни реклама қилиш ноқонуний ҳисобланади. Шу мақсадда ўтказилган 1105та ўрганишларнинг 102тасида бундай хизматлар рекламаси аниқланган ва уларнинг барчаси бартараф этилган.

«Ахборот ва оммавий коммуникациялар агентлиги билан ҳамкорликда 30дан ортиқ тотализатор ва букмекерлик рекламасини ноқонуний равишда юритувчи сайтларга кириш чеклаб қўйилди. Бу соҳадаги ишлар давом этмоқда», дейилади баёнотда.

Шуниндек дарахтларга ўрнатилган 3416та ноқонуний реклама ва эълонлар олиб ташланиши таъминланган.

Бундан ташқари, моддий-маданий меросларнинг 386та кўчмас мулк объектларида ташқи рекламани жойлаштириш бўйича ўрганишлар олиб борилган. Натижада 25 дан ортиқ ҳолатда рухсатсиз реклама жойлаштирилганлиги аниқланган ва уларга нисбатан тегишли чоралар кўрилган.