ОКМК: Рационализаторлик ғоялари – тараққиёт омили

Комбинат таркибидаги Саноат темирйўл транспорти бошқармаси бу мажмуанинг корхоналарини ўзаро боғловчи ришта бўлиб, рудаларни ўз вақтида бойитиш фабрикаларига етказишдек масъулиятли вазифани бажариб келади. Бундан ташқари, комбинатга келадиган технологик юклар ва жўнатиладиган маҳсулотлар ҳам айнан саноатнинг қон томирлари бўлган темирйўл орқали ўз манзилларига етказилади.

СТТБ таркибида айни пайтда 13та темирйўл станциялари бўлиб, темирйўллар умумий узунлиги – 249,05 километрни ташкил этади. Комбинатда амалга ошириб келинаётган инвестициявий лойиҳалар доирасида темирйўл транспорти соҳасида ҳам салмоқли ишлар бажарилмоқда. Жумладан, “Саноат темирйўл транспорт бошқармаси марказий йўл участкасини модернизация қилиш” инвестиция лойиҳасини амалга ошириш ишлари жадаллик билан давом эттирилмоқда.

Юк ташиш жараёни энг мақбул логистика ва транспорт йўналишларини доимий равишда такомиллаштиришни талаб қилади. Февраль ойининг бошида “Олмалиқ КМК” АЖ логистика ва темирйўл транспорти бўлими ташаббуси билан комбинатга “Озодлик” станцияси орқали кирувчи ва чиқувчи юкларнинг маршрутини ўзгартириш бўйича кўриб чиқиш учун техник қарор қабул қилинди. Ушбу таклиф ОКМК раҳбарияти томонидан қўллаб-қувватланиб, уни амалиётга жорий этиш вазифаси белгиланди. Мазкур таклиф амалиётга жорий этилиши натижасида комбинат таркибий бўлинмаларида ишлаб чиқариш учун зарур бўлган технологик юкларнинг барқарор қабул қилиниши таъминланиб, 2040 йилгача уч бараваргача ўсиши кутилаётган юк ташиш ҳажмини қабул қилиш ҳамда йилига 6,7 млрд сўм маблағни иқтисод қилиш имконияти туғилади.

Бундан ташқари, ОКМК логистика ва темирйўл транспорти бўлими бошлиғи Умар Мавлянқуловнинг маълум қилишича, маҳсулотлар таннархини камайтириш, олиб келинадиган рудалар ва технологик юкларни етказиб беришда автоташувлар масофасини қисқартириш мақсадида “Чодак кон бошқармасининг товар-моддий бойликларини “Поп” темирйўл бекатидан “Темирйўлобод” бекатига ташиш маршрути схемасини ўзгартириш” номли рационализаторлик таклифи ҳам берилган. Мазкур таклифга кўра, Чодак кон бошқармасидан 12 км узоқликда жойлашган “Темирйўлобод” темирйўл бекатининг омбор хўжалиги кўчирилиши кўзда тутилган.

Чодак кони бошқармасидан юк ташиш темирйўл орқали жўнаш бекатидан “Ўзбекистон темирйўллари” АЖнинг “Поп” бекатигача, кейин “Поп” бекатидан Чодак кони бошқармаси омборларигача ташиш масофа оралиғи 70 км бўлган йўл орқали автотранспорт ёрдамида амалга ошириб келинар эди.

Шунингдек, Чодак кон бошқармасининг мавжуд довон базаси юкларни, шу жумладан ярим усти очиқ вагонларни (полувагон) оммавий қабул қилиш учун мўлжалланмаган. Чунки икки томонлама тушириш учун мўлжалланган бункерлар бўлмаган. Ушбу темирйўлдан ташқари, темирйўлнинг Р-43 маркали рельслар ёрдамида йиғилган шпал панжаралари маънавий ва техник жиҳатдан эскирган.

Ушбу лойиҳани амалга ошириш бўйича ишлар ўз вақтида ташкил этилди. Зарур миқдордаги йўл қурилиши техникалари ажратилди. Темирйўл инфратузилмаси қурилишини ўз вақтида якунлаш учун зарур иш қобилиятига эга штат бирликлари, темирйўл монтажчилари, марказий сигнализация, блоклаш ва алоқа мутахассислари ҳамда комбинатнинг бошқа мутахассислари ҳам жалб қилинди.

Ушбу лойиҳа амалга оширилиши натижасида ташиш масофаси 58 кмга қисқаради ва ёнилғи-мойлаш материалларини (дизель ёнилғиси, шиналар ва бошқалар) иқтисод қилинишига эришилади. Дастлабки ҳисоб-китобларга кўра, лойиҳа ишга туширилиши натижасида йилига тахминан ўртача 500,0 млн сўм маблағ тежалади. Шунингдек, комбинат эҳтиёжлари учун қуйидаги технологик юкларни темирйўл транспортида ташиш режаларини ўз вақтида таъминлаш имконияти яратилади.

Жумладан, Ковулди конидан йилига 24 000 тонна руда ташиш имконини беради. Бундан ташқари, йилига 1920 тонна оҳак, 480 тонна суюқ хлор, 960 м3 ёғоч материаллари, 480 тонна пўлат шарлар, 120 тонна цемент, 200 тонна қум, шебень ва бошқа товар-моддий бойликларни ўз манзилига етказиш имконини беради.

Бугунги кунга келиб мазкур объект қурилиши якунланиб, ўрнатилган тартибда ишга тушириш учун зарур бўлган рухсат берувчи ҳужжатлар тайёрланмоқда.

Шу билан бирга, мавжуд темирйўл участкаларини модернизация қилиш ишлари яна давом эттирилади.

Шерзод Тиловбердиев,
ОКМК матбуот хизмати Ⓣ