Дам олиш кунлари ёмғир ёғади - «Ўзгидромет»

Бугун Ўзбекистон ҳудудига Эрон ҳудудларидан жуда илиқ ҳаво кириб келмоқда. Республика бўйича қуруқ об-ҳаво кутилади, ҳаво ҳарорати 20-23 даража иссиқ, жанубда ва чўл ҳудудларида 25-27 даража иссиққача бўлади. Фақат Қорақалпоғистонда баъзи жойларда кечга томон ёмғир ёғади.

Фото: Kun.uz

“Ўзгидромет” хабарига кўра, дам олиш кунлари республика бўйича баъзи жойларда ёмғир ёғади, якшанба куни шимолда қорга айланиши мумкин. Тоғолди ва тоғли ҳудудларда ёғингарчилик, баъзи жойларда кучли бўлади. Ҳаво ҳарорати пасаяди ва 5 мартда кечаси 10-15 даража илиқни, кундузи 13-18 даража илиқни, 6 мартда кечаси 5-10 даража илиқни, кундузи 12-17 даража илиқни ташкил этади.

Илиқ ҳавонинг жадал кириб келиши, сўнгра Кавказ ҳудудларидан нисбатан салқин ҳаво кириб келиши натижасида республика бўйича баъзи жойларда шамол тезлиги 18-23 м/с гача кучаяди ва чанг кузатилиши мумкин. Қорақалпоғистон Республикаси, Бухоро, Навоий, Самарқанд, Жиззах, Қашқадарё вилоятларининг айрим жойларида шамол тезлиги 25-30 м/с гача кучайиши мумкин.