Ўзбекистоннинг 20 млн доллар қарзи сўмга ўтказилди

Ўзбекистон Молия вазирлиги Европа Тикланиш ва Тараққиёт банки билан жорий йилнинг 7 март куни илк синов своп операциясини амалга оширди. Бу ҳақда вазирлик матбуот хизмати хабар бермоқда.

Своп битимлари молиявий рискларни бошқариш учун ишлатиладиган молиявий инструмент ҳисобланади. Валютавий своп битими своп турларидан бири бўлиб, турли валютадаги қарзларни валюта рискидан ҳимоя қилиш учун фойдаланилади.

Маълум қилинишича, Молия вазирлиги томонидан мазкур битим Халқаро своп ва деривативлар ассоциацияси (ИСДА) бош келишуви бўйича халқаро юридик компания Дентонсдан ижобий ҳуқуқий хулосаси олинган.

“Своп битими бўйича энг яхши нарх таклиф қилган ЕТТБ билан ИСДА бош келишуви имзоланди ва Осиё тараққиёт банкидан хорижий валютада жалб қилинган қарз маблағларининг 20 миллион АҚШ доллари қисми бўйича своп операцияси амалга оширилди. Қисқа қилиб айтганда, ушбу илк синов своп операцияси орқали 20 миллион АҚШ долларидаги давлат қарзи миллий валютадаги қарзга ўгирилди”, – дейилади расмий хабарда.

Своп операциясини амалга ошириш нимани англатади?

— Илк синов своп операцияси Ўзбекистон молия бозорида, хусусан, давлат ва хусусий сектор томонидан жалб қилинаётган ташқи қарз маблағларининг хорижий валюта рискларини самарали бошқаришда халқаро контрагентлар билан деривативлардан фойдаланишга йўл очиб беради;

— Хориждан миллий валютада инвестиция жалб қилиш имконияти мураккаблиги ва чекланганлигини ҳисобга олганда, чет эл валютасидаги инвестицияларни дериватив инструментлар орқали сўмга ўгириш муқобил восита вазифасини бажаради;

— Деривативлар бозорининг ривожланиши Ўзбекистон капитал бозорида молиявий рискларни самарали бошқаришга, хорижда эса сўмдаги актив ва мажбуриятларнинг тўғри баҳоланишига ҳамда миллий валюта бозорининг шаклланишига хизмат қилади;

Аввалроқ, 2021 йил давомида Ўзбекистоннинг давлат қарзи 2,9 млрд долларга ошиб, 26,3 млрд долларга (ЯИМга нисбатан 38 фоиз) маълум қилинганди.