Еврокомиссия Венгрия ва Словакияга Россиядан нефт сотиб олишга рухсат бериши мумкин

Маълумотларга кўра, Словакия нефт ва нефт маҳсулотларининг 96 фоизини, Венгрия эса 58 фоизини Россиядан олади.

Фото: Getty Images

Еврокомиссия Венгрия ва Словакиянинг Россия нефтига қарамлигини ҳисобга олиб уларга бу мамлакатдан нефт сотиб олишга рухсат бериши мумкин.

Аввалроқ Еврокомиссия ижрочи вице-президенти Валдис Домбровскис Times газетасига берган интервюсида Евроиттифоқ Россияга қарши санкцияларнинг олтинчи пакети тайёрланаётгани, ундаги моддалардан бири нефт эмбаргоси бўлиши мумкинлигини айтганди.

ЕИ расмийларининг маълум қилишича, Еврокомиссия Евроиттифоқдаги бирликни сақлаб қолиш учун Словакия ва Венгрияга истисно қилиши ёки бу мамлакатларга "узоқ ўтиш даври"ни таклиф қилиши мумкин. Манбаларнинг айтишларича, эмбарго босқичма-босқич жорий этилади ва келгуси йил бошида тўлиқ кучга киради.

Халқаро энергетика агентлиги маълумотига кўра, Словакия нефт ва нефт маҳсулотларининг 96 фоизини, Венгрия эса 58 фоизини Россиядан олади.