АҚШ ҳарбий-ҳаво кучлари маълумотларига кўра, AGM-183А гипертовушли ракетаси 14 май куни Калифорния жанубида учирилган. Ракетанинг тезлиги товуш тезлигидан беш баравар кўп бўлган.
АҚШ ҳарбий-ҳаво кучлари 16 май, душанба куни AGM-183А ARRW (Air-Launched Rapid Response Weapon) гипертовушли ракетаси муваффақиятли синовдан ўтказилганини эълон қилди. 14 май куни Boeing B-52H Stratofortress стратегик бомбардимончи самолёти Калифорния жанубий қирғоқлари яқинида ракета учирди, деб хабар берди АҚШ ҳарбий-ҳаво кучлари.
«Самолётдан ажралиб чиққанидан сўнг, ARRW блоки кутилган вақт давомида ёниб турди ва товуш тезлигидан беш баравар юқори гипертовуш тезлигига етди», — дейилади ҳужжатда.
АҚШ гипертовушли қуролларни ишлаб чиқиш билан шуғулланаётган ягона давлат эмас, уларнинг тезлиги ва ҳаракати кузатиш ҳамда ушлаб олишни қийинлаштиради, деб ёзади Reuters агентлиги.
Америкалик ҳарбийлар Россия Украина ҳудудидаги жанговар операцияларда гипертовушли ракеталардан фойдаланаётгани, Хитой эса гипертовушли қуролларни синовдан ўтказаётганини маълум қилганди. Октябр ойида Хитой Ташқи ишлар вазирлиги бундай синовлар ҳақидаги хабарларни рад этиб чиқди.
