«Ўзмедимпекс» директори ва ССВ масъул ходими вазифасидан озод этилди

Соғлиқни сақлаш вазирининг тегишли буйруғига асосан «Ўзмедимпекс» давлат унитар корхонаси директори Диёрхон Каттахўжаев эгаллаб турган лавозимидан озод этилди. Бу ҳақда ССВ матбуот котиби хабар берди.

Таъкидланишича, у хизмат фаолиятида йўл қўйган хато ва камчиликлари ҳамда тизимда давлат харидларини амалга оширишдаги сусткашлиги учун ишдан олинган. Шунингдек, Соғлиқни сақлаш вазирлигининг Дори воситалари, тиббий буюмлар ва жиҳозлар муомаласини тартибга солиш ҳамда мурувват ёрдамини мувофиқлаштириш бошқармаси масъул ходими ҳам эгаллаб турган вазифасидан озод этилган.

Эслатиб ўтамиз, 2019 йил декабрида бош прокурор Ниғматилла Йўлдошев «Ўзмедимпекс» корхонаси дори воситаларини қиммат сотиб олиб, бюджетга 9,3 млн доллар ва 4 млрд сўм зарар етказгани ҳақида маълум қилганди. Ўша йили шифохоналарга яроқлилиги сентябрда тугайдиган 7 миллиард сўмлик 107 мингдан ошиқ аэрозол тарқатган - ҳолбуки бу дорига йиллик ҳақиқий эҳтиёж бундан 250 баравар кам бўлган.