Ўзбекистон миллий жамоаси муддатидан олдин Осиё Кубоги йўлланмасини қўлга киритди

Осиё Кубоги-2023 саралаши доирасида 3-турнинг дастлабки баҳсида Фаластин (9) Филиппин (4) дарвозасига жавобсиз 4та тўп киритиб, ўз гуруҳида 1-ўрин билан турнирнинг финал босқичига чиқди. 

Гуруҳнинг иккинчи баҳсида Яман (1) Мўғулистон (0) билан ўйнайди. Аммо ушбу гуруҳда 2-ўринни эгаллаган жамоа 4 очкодан кўп жамғара олмайди. 

Натижада қолган гуруҳлардаги 6 очко тўплаган жамоалар, жумладан, Ўзбекистон ҳам 3-тур олдидан муддатидан аввал қитъа чемпионатига йўлланма олишди — Ўзбекистон, Таиланд, Иордания, Ҳонгконг, Ҳиндистон, Баҳрайн, Тожикистон ва Қирғизистон.

Сречко Катанец бош мураббийлигидаги Ўзбекистон ўз гуруҳида биринчи ўйинда Шри-Ланкани 3:0, Мальдив оролларини 4:0 ҳисобида мағлуб этганди. Учинчи тур доирасида Таиландга қарши баҳс 14 июн куни соат 20:30 да старт олади.

Маълумот учун, Ўзбекистон кетма-кет 8-марта, Тожикистон эса ўз тарихида илк бор Осиё чемпионатида иштирок этади.

Эслатиб ўтамиз, саралашда 6та гуруҳ бор ва улардаги 1-ўрин соҳиблари ҳамда 2-ўрин эгаларидан энг яхши 5таси финал босқичига чиқади.

Осиё Кубоги-2023 саралаши
В гуруҳи 3-тур. 14 июнь
Фаластин — Филиппин 4:0
Голлар: Чиҳадеҳ (31), Сейам (42), Ямин (55), Абу Варда (72).