Олий таълимга ўқишга киришда хотин-қизларга қўшимча 2 мингта давлат гранти ажратилади 

“Давлат олий таълим муассасаларига ўқишга қабул қилиш жараёнларини ташкил этиш тўғрисида”ги президент қарори қабул қилинди.

“Ҳуқуқий ахборот” канали хабарига кўра, 2022/2023 ўқув йилидан республикада фаолият юритаётган хорижий ва нодавлат олий таълим ташкилотларига давлат гранти асосида кадрлар тайёрлаш бўйича 1 000 та ўрин ажратиб борилади. 

Оила ва хотин-қизлар давлат қўмитаси тавсияномасини олган, олий маълумотга эга бўлмаган хотин-қизлар учун 2022/2023 ўқув йилидан бакалавриатнинг кундузги таълим шакли бўйича умумий белгиланган давлат гранти асосидаги қабул параметрларига қўшимча 2 000 та давлат гранти ажратилади. Бунда:

• тавсияномага эга хотин-қизлар учун давлат гранти асосида ажратиладиган қабул параметрлари камида 50 фоизи аниқ ва табиий фанлар, техника ва тиббиёт йўналишлари орасида тақсимланади;
• ҳар йили 20 июлгача тавсияномага эга хотин-қизлар учун давлат гранти ўринлари ОТМ ва бакалавриат таълим йўналишлари бўйича тақсимоти Олий ва ўрта махсус таълим вазирлиги сайтида эълон қилинади.

Қуйидагилар давлат бюджети маблағлари ҳисобидан қопланади:

2021/2022 ўқув йилида давлат ОТМ магистратурасига талабаликка қабул қилиниб, тўлов-контракт асосида таҳсил олаётган хотин-қизлар 2022/2023 ўқув йили учун тўлов-контракт миқдори;

2022/2023 ўқув йилидан давлат ОТМ магистратурасига ажратилган қабул параметрлари доирасида базавий тўлов-контракт асосида талабаликка қабул қилинган хотин-қизлар тўлов-контракт миқдори.