Имомали Раҳмон Тожикистондаги вазиятни беқарорлаштиришга тайёр кучлар ҳақида огоҳлантирди 

«Давлатимиз ва халқимиз сотқинлари ва ғаразгўйлари, миллий ва давлат манфаатларини оёқости қилиб, ўз эътиқоди ва виждонини чет эллик хўжайинларига сотганлар ҳалигача ўз ғаразли ният ва режаларидан воз кечгани йўқ», — дейилади Тожикистон раҳбарининг душанба куни матбуот хизмати томонидан тарқатилган мурожаатида. 

«Шунинг учун биз тинчлик, осойишталик, сиёсий барқарорлик ва миллий бирликни ҳимоя қилишга доим тайёр бўлишимиз ва ҳеч қачон сиёсий ҳушёрликни йўқотмаслигимиз керак», деди Имомали Раҳмон. 

У ўтган асрнинг 90-йиллари бошларида «Тожикистон фуқаролар уруши гирдобига тушиб қолгани, бунинг натижасида жамият ва давлатнинг барча соҳалари фожиали инқирозга юз тутганини» эслади. 

Унга кўра, тожик миллатининг емирилиши ва мамлакатнинг дунё сиёсий харитасидан йўқолиб кетиш хавфи бор эди. 

«Тинчлик бўйича узоқ давом этган музокаралар 1997 йил 27 июнь куни Москва шаҳрида тарихий ҳужжат – Тожикистонда тинчлик ва миллий тотувликни ўрнатиш тўғрисидаги бош келишув имзоланиши билан якунланди», деб эслайди Имомали Раҳмон. 

Унинг қайд этишича, Тожикистон тинчликпарварлик ва миллий бирдамликни таъминлаш тажрибаси нафақат тожик миллатини қутқариш омилига айланган, балки жаҳон ҳамжамияти ва нуфузли халқаро ташкилотлар томонидан можаро ва қарама-қаршиликларни бартараф этишда ибратли тарихий сабоқ, ўзига хос тажриба сифатида эътироф этилган. 

«Тинчлик ва осойишталикнинг аҳамияти замонавий шароитда, айниқса, сўнгги йилларда, инсоният ўта оғир муаммоларга дуч келаётганида тобора ортиб бормоқда, – деди Имомали Раҳмон. – Глобал иқлим ўзгаришининг оғир оқибатлари, жумладан, сув танқислиги, қурғоқчилик, озиқ-овқат тақчиллиги, дунё бўйлаб озиқ-овқат нархларининг ошиши ва юқумли касалликлар тарқалиши, хавфсизлик муаммолари, терроризм, экстремизм каби замонавий таҳдидларнинг мисли кўрилмаган даражада кенгайиши билан бир қаторда, радикализм, қурол-яроғ ва гиёҳванд моддалар савдоси, кибержиноят ва бошқа трансмиллий уюшган жиноятчилик инсоният ҳаётини жуда чидаб бўлмас ҳолга келтирди». 

Президент Тожикистон халқини «жаҳон ҳамжамиятидаги шундай нозик шароитда» тинчлик, осойишталик, сиёсий барқарорлик ва миллий бирликнинг аҳамиятини англаб етишга, бу бебаҳо неъматларни энг катта ютуғи қаторида ҳимоя қилишга чақирди.