Путин БМТ Бош ассамблеясига бормаслиги маълум қилинди 

БМТ Бош ассамблеясининг 77-сессиясида Россия делегациясига президент Владимир Путин ўрнига ташқи ишлар вазири Сергей Лавров бошчилик қилади. Бу ҳақда Кремл расмий вакили Дмитрий Песков маълум қилди.

Унинг сўзларига кўра, Путин шунингдек, сессияда чиқиш қилишни ҳам рад этган. Россия президенти охирги марта 2020 йил сентябрда БМТ Бош ассамблеясининг 75-сессиясида чиқиш қилганди.

Россия делегацияси таркибидан Сергей Лавровдан ташқари, унинг ўринбосари Сергей Вершинин, давлат думаси ва федерация кенгаши вакиллари Леонид Слуцкий ва Григорий Карасин ҳамда Россия ташқи ишлар вазирлиги департаментлари директорлари ўрин олади.

БМТ Бош ассамблеясининг 77-сессияси 13 сентябр куни очилади ва 27 сентябргача давом этади. Сессияда 20 сентябр куни АҚШ президенти Жо Байден ва 21 сентябр куни Украина президенти Володимир Зеленский чиқиш қилиши кўзда тутилган.