Бутун пандемиядаги энг кучли COVID-19 тарқалишига дуч келган Хитойда денгизда тутилган балиқлар SARS-CoV-2 коронавируси учун тестдан ўтказила бошланди.
Хитойда ҳатто денгизда овланган балиқлар ҳам энди SARS-CoV-2 коронавирусига текширилиши керак. Бу ҳақда dpa агентлиги 19 август, жума куни хабар берди. Айни пайтда тармоқда тарқалаётган, Сямэн портида балиқ қандай оғзини очгани ва у ердан пахта таёқчаси ёрдамида ковид тести учун намуна олинаётгани акс эттирилган видео интернетнинг Хитой сегментида шов-шув ва кулгили шарҳларга сабаб бўлди.
Dpa сўровига жавобан, Сямэн соғлиқни сақлаш департаменти вакили порт шаҳарда ҳақиқатан ҳам нафақат денгиздан қайтаётган балиқчилар, балки улар олиб келган балиқлар ҳам COVID-19 учун тестдан ўтказилаётганини тасдиқлади. Унинг сўзларига кўра, бундай текширувлар Жимей тумани ҳокимиятининг махсус буйруғига асосан амалга оширилмоқда. Ҳужжат июль ойи охирида хитойлик балиқчилар денгизга чиқишда бошқа мамлакатлардан келган балиқчилар билан ноқонуний шартномалар тузиб, улардан балиқ сотиб олишига боғлиқ ҳолда чиқарилган.
SARS-CoV-2 вируси биринчи марта 2019 йил декабрь ойида аниқланган Хитой қатъий «ноль ковид» стратегиясини амалга оширмоқда. У чет элликлар учун бутунлай ёпиқ. Мамлакатга киришга рухсат берилган оз сонли ташриф буюрувчилар одатда меҳмонхона карантин хонасида етти кун бўлиши керак, кейин эса уч кун кузатув остида ўтиради. Миллионлаб аҳолиси бўлган мегаполисларда одамлар одатда ҳар уч кунда бир марта тестдан ўтказиляпти. Смартфондаги махсус иловада COVID-19 тестининг манфий натижасига эга бўлиш ҳатто дўконлар, бозорлар ёки шахсий турар жой мажмуасига кириш учун ҳам зарур.
Бундан ташқари, одамлар ижтимоий алоқаларини кузатиш учун COVID-19 мобил дастурий иловаси ёрдамида ўзларини ҳамма жойда сканерлашлари керак. Ковид билан касалланган ёки «хавф гуруҳида» бўлган шахс сифатида аниқланган ҳар қандай киши ўзини яккалаши лозим. COVID-19 учун тести мусбат натижа берганлар касалхонага ётқизилади. Баъзида аҳоли орасида касалланган одам аниқланса, бутун мавзеларда локдаун жорий этиляпти. Аммо қатъий чораларга қарамай, дунёда энг кўп аҳолиси бўлган мамлакат ҳозирда пандемия давридаги энг кучли коронавирус тарқалиши ҳолатини бошдан кечирмоқда, сабаби унинг сўнгги тури - омикрон осон тарқалади.
Жума куни Хитой Миллий соғлиқни сақлаш комиссияси 500 дан ортиқ янги COVID-19 ҳолатлари ва 2000 дан ортиқ аломатсиз ҳолатлар ҳақида хабар берди. Айниқса Хайнан оролида касалликка гумонланганлар жуда кўп. Ўн минглаб дам олувчилар у ерда қолиб кетишган. Сямэн денгиз фаолиятини ривожлантириш бюроси Ҳонгконгнинг South China Morning Post нашрига инфекцияни Хайнанга денгизда бошқа мамлакатлардан келган балиқчилар билан алоқада бўлган хитойлик балиқчилар олиб келган бўлиши мумкинлиги тўғрисида хабар берди. Улар журналистларнинг балиқ ва балиқчилар SARS-CoV-2 учун тестдан ўтказилаётгани ҳақидаги саволига: «Биз бу иш қилинаётган ягона жой эмасмиз», деб жавоб берди.
