Зеленский БМТ Хавфсизлик кенгашида: «Бизнинг мустақиллигимиз - сизнинг хавфсизлигингиз»

Украина президенти Володимир Зеленский 24 август, чоршанба куни Нью-Йоркдаги БМТ Хавфсизлик кенгаши йиғилиши иштирокчиларига видео-алоқа орқали мурожаат қилиб, ўз мамлакатининг Россия тажовузига қарши мудофаавий кураши глобал аҳамиятини таъкидлади. «Бугун мамлакатимиз Мустақиллик байрамини нишонламоқда, ҳозир бутун дунё мустақиллигимизга қанчалик боғлиқ эканини ҳамма кўриб турибди», деди у.

«Агар Россия ҳозир тўхтамаса, Россияни Украина ғалабаси тўхтатмаса, унда бу қотилларнинг барчаси охир-оқибат Европа, Осиё, Африка, Лотин Америкасидаги бошқа мамлакатларга ҳам келиши мумкин», - деди Украина президенти. Унинг таъкидлашича, Россия Украинага қарши тажовуз учун жавобгарликка тортилиши керак.

Зеленский келаси йили Киевда БМТ шафелигида Келажак саммитини ўтказишни таклиф қилди. «БМТ бош котиби Антониу Гутерриш келаси йили «Келажак саммити»ни ташкил қилмоқчи. Биз бу ташаббусни қўллаб-қувватлаймиз ва умумий келажагимизни қуриш учун инсониятнинг тинчликда, яъни босқинчилик, мустамлакачилик амбицияларидан холи яшашига имкон бермаган нарсаларни тарих чиқиндисига қолдириш зарурлигини яна бир бор тасдиқлаймиз», деб таъкидлади у.

Зеленскийнинг сўзларига кўра, «бу саммитни Украинада, умуман келажаги бор-йўқлиги ҳал қилинган мамлакатда ўтказиш рамзий маънога эга бўларди». «Бу масала Запорижжя АЭСда, денгиз портларимизда, Донбассда, Қримда ҳам ҳал қилинмоқда. Бизнинг мустақиллигимиз - сизнинг хавфсизлигингиз», - деди Украина президенти. 

Аввалроқ Россия Зеленский билан видеоконференция ўтказишга тўсқинлик қилишга уриниб кўрган эди. РФнинг БМТдаги доимий вакили Василий Небензя ўз позициясини Россия делегацияси «фақат Украина президентининг Хавфсизлик кенгаши мажлисида шахсан иштирок этишини қўллаб-қувватлаши» билан асослади. Небензянинг сўзларига кўра, Зеленский кенгаш йиғилиши учун Нью-Йоркка учиб келиши мумкин эди. БМТ Хавфсизлик кенгашининг 15 аъзосидан 13 таси эса Россия талабини қўллаб-қувватламади. Хитой бетараф қолди. 

БМТ бош котиби Гутерриш Россиянинг Украинага бостириб киришидан кейинги олти ойни қайғули ва фожиали воқеа деб атади. Хавфсизлик кенгашининг Украина Мустақиллик кунига бағишланган навбатдан ташқари йиғилишида сўзлаган Гутерриш Украинада содир бўлаётган воқеаларни «бемаъни уруш» деб атади. 

Бош котиб Россия қўшинлари томонидан босиб олинган ва сўнгги пайтларда тез-тез ўққа тутилаётган Запорижжя АЭСдаги вазиятдан алоҳида хавотир билдирди. «Бундан кейин ҳар қандай кескинлашув ўз-ўзини йўқ қилишга олиб келиши мумкин», деб огоҳлантирди Гутерриш.