Фойдаланилмаётган объектга нисбатан оширилган солиқ натижасида ҳосил бўлган қарз ҳисобдан чиқарилди

Фото: iStroyPortal

“Таъсирчан солиқ механизмини қўллаш натижасида ҳосил бўлган солиқ қарзини ҳисобдан чиқариш тўғрисида”ги президент фармони қабул қилинди.

Фойдаланилмаётган объектлар мулкдорларига нисбатан оширилган ставкаларда қўлланилган таъсирчан солиқ механизми натижасида ҳосил бўлган мол-мулк солиғи ва ер солиғи бўйича: мавжуд солиқ қарзи ҳисобдан чиқарилади; солиқ қарзини ундириш билан боғлиқ суд ва ижро ишлари тугатилади.

2022 йил 1 июлдан фармон кучга киргунга қадар бўлган даврда таъсирчан солиқ механизмини қўллаш натижасида ундирилган солиқ келгуси тўловлар ҳисобига мулкдорларга қайтарилади.

1 июлдан бўш турган бинолар, фойдаланилмаётган ишлаб чиқариш майдонлари, яшаш учун мўлжалланмаган иншоотлар, тугалланмаган қурилиш объектларига ҳамда ушбу объектлар билан банд ерга мол-мулк солиғи ва ер солиғи оширилган ставкаларини қўллаш, солиқ имтиёзлари ва преференциялар амал қилишини тўхтатиш тартиби бекор қилинган.