Қозоғистонда ўзаро муштлашув уюштирган икки россиялик мамлакатдан чиқариб юборилади 

Россиянинг икки фуқароси Уралск шаҳридаги тунги клуб ёнида муштлашув уюштиргани сабабли Қозоғистондан чиқариб юборилади. Бу ҳақда Tengrinews.kz хабар берди.

Хабарга кўра, воқеа 30 сентябр куни содир бўлган. Полиция ходимлари Уралск шаҳридаги тунги клуб ёнида икки эркак муштлашаётганини кўришган.

Полициячиларнинг маълумот беришича, Россия фуқаролари маст ҳолатда бир-бирлари билан муштлашишган.

Уларга нисбатан майда безорилик, жамоат жойида маст ҳолатда юриш, осойишталикни бузиш моддалари билан маъмурий баённомалар тузилган ва 5 суткага қамоқ жазоси тайинланган.

Уралск шаҳри ихтисослашган маъмурий суди ҳар икки қоидабузарни мамлакатдан чиқариб юбориш тўғрисида қарор чиқарган.

Маълумотларга кўра, Россияда сафарбарлик эълон қилинганидан сўнг дастлабки уч кунда Уралск шаҳрига деярли 17 минг россиялик ўтган.