Париж Франция фуқароларини Эронни тарк этишга чақирди

Франциядан Эронга ташриф буюрган ҳар қандай меҳмон ўзбошимчалик билан қўлга олиниши ва адолатсиз судга тортилиши хавфи бор, инсон ҳуқуқларига риоя этилиши эса кафолатланмайди, дея маълум қилди Франция Ташқи ишлар вазирлиги.

Фото: AP

Франция ҳукумати Эрондаги фуқароларини «ўзбошимчалик билан қўлга олиниш хавфи борлигини ҳисобга олиб, имкон қадар тезроқ мамлакатни тарк этишга» чақирди. Бу ҳақда 7 октябр, жума куни Франция ТИВ сайтида эълон қилинган сайёҳлар ва саёҳатчилар учун янгиланган тавсияларда айтилади.

Ҳужжатда аниқлик киритилишича, «Франциядан Эронга келган ҳар қандай ташриф буюрувчи, шу жумладан, икки фуқароликка эга бўлганларнинг ҳибсга олиниши, ўзбошимчалик билан ушланиши ва адолатсиз судга тортилиши хавфи юқори. Бу хавф оддий туристик сафарда бўлган одамларга ҳам тегишли». Эронда ҳибсга олинган ёки ушланган тақдирда «асосий ҳуқуқлар ва шахсий хавфсизлик кафолатланмайди», дейилади Ташқи ишлар вазирлиги тавсияларида.

2021 йил май ойида Франция фуқаролари ва ўқитувчилар касаба уюшмаси аъзолари Сесил Колер ва Жак Парис Эронда ҳибсга олинди, Ислом республикаси ҳукумати уларни жосусликда айблади. Франция ТИВ сайтида тавсиялар эълон қилиниши арафасида Эрон давлат телевидениеси Колер ва Парис иштирокидаги видеони намойиш этди, унда улар содир этилган жиноятларга «иқрор» бўлган. Франция Ташқи ишлар вазирлиги ушбу видеони «қабул қилиб бўлмас ва жирканч саҳна асари» деб атади ва ҳибсга олинганларни зудлик билан озод қилишга чақирди.

Бундан ташқари, Эронда яна икки француз фуқароси қамоқда - 2020 йил май ойида қўлга олинган ва жосусликда айбланган саёҳатчи Бенжамин Бриер ҳамда 2019 йил июнь ойида ҳибсга олинган ва кейин беш йилга қамалган антрополог тадқиқотчи Фариба Аделҳа. У Франция фуқаролигидан ташқари Эрон фуқаролигига ҳам эга.

Аввалроқ, 30 сентябр куни Эрон разведка вазирлиги 22 ёшли Маҳса Аминий ўлимидан сўнг намойишларда қатнашган Европа давлатларининг тўққиз нафар фуқароси норозилик намойишлари чоғида қўлга олингани ҳақида хабар берган эди. Маҳкама ҳибсга олинганларнинг шахсини айтмаган ҳолда, улар орасида Германия, Полша, Италия, Франция, Нидерландия, Швеция ва бошқа мамлакатлар фуқаролари борлигини билдирди.

Эронда полиция зўравонлиги қурбони бўлган Махса Аминийнинг дафн маросимидан сўнг аёлларга қарши зулм ва полиция зўравонлигига қарши оммавий норозилик намойишлари бошланди – 13 сентябр куни қиз Теҳронда полиция томонидан қўлга олинди. Полициядан у кома ҳолатида касалхонага олиб кетилган, бир неча кундан кейин вафот этганди.

Эрон расмийлари халқаро майдонда ўз манфаатлари йўлида музокаралар олиб бориш учун хорижлик гаровга олинганлардан фойдаланганликда ҳам айбланмоқда.

#Эрон #Франция