Путин Россия ҳудудида янги ҳужумлар содир бўлса, қаттиқ реакция билдирилишини маълум қилди

Россия президенти Владимир Путин стратегик аҳамиятга эга Қрим кўприги портлатилганидан икки кун ўтиб, Украинани Россия ҳудудида «террорчилик ҳужумлари давом этса» Москва кескин муносабат билдиришидан огоҳлантирди. «Россиянинг жавоблари қаттиқ бўлади ва кўлами бўйича РФ таҳдидлари даражасига мос келади», деди у 10 октябр, душанба куни Россия Хавфсизлик кенгашининг доимий аъзолари билан учрашувда.

Путиннинг сўзларига кўра, 10 октябр куни эрталаб Россия «Украинадаги энергетика, ҳарбий қўмондонлик ва алоқа объектларига юқори аниқликдаги, узоқ масофали ҳаво-денгиз ва қуруқликдаги аниқ қуроллар билан катта зарба берган».

8 октябр куни эрталаб миналанган юк машинасининг портлаши натижасида Қрим кўприги жиддий шикастланди. Бу янгилик Украина Telegram каналларида кенг маъқулланди. Эстония ташқи ишлар вазири Урмас Рейнсалу Қрим кўпригининг портлатилганини олқишлади ва «ушбу операцияни уюштиргани аниқ бўлиб турган» Украина махсус амалиёт кучларини табриклади.

10 октябр куни Россия қўшинлари Украинанинг муҳим инфратузилмасига юзга яқин ракеталар отиб, бир қатор йирик шаҳарларни электр таъминотидан узиб қўйди ва бир қанча электр станцияларини вайрон қилди. Украина томонига кўра, Россия авиазарбалари натижасида камида саккиз киши ҳалок бўлган, яна 24 киши жароҳатланган. Ғарб давлатлари Россиянинг ҳаракатларини кескин қоралади. Европа ташқи сиёсий хизмати вакили уларни «варварлик», «қўрқоқлик» ва «ҳарбий жиноят»га тенг деб атади.