Полша Украина билан чегарадаги портлашдан кейин Россия элчисини чақиртирди

Полша Ташқи ишлар вазирлиги Россия элчиси Сергей Андреевни Полшанинг Украина билан чегарадош Пшеводув қишлоғида юз берган портлаш муносабати билан чақиртирди. Бу ҳақда 15 ноябрь, сешанба куни Полша Ташқи ишлар вазирлиги сайтида хабар берилди. 

Ташқи ишлар вазирлиги маълумотларига кўра, Россия қуролли кучлари томонидан Украина ҳудудини «кўп соатлик оммавий ўққа тутиш» вақтида, «соат 15:40 да Россияда ишлаб чиқарилган ракета Хрубешовский тумани Люблин ҳудуди Пшеводув қишлоғи ҳудудига қулаган», натижада икки Полша фуқароси ҳалок бўлган. «Шу муносабат билан ташқи ишлар вазири Збигнев Рау Россия элчисини зудлик билан батафсил тушунтиришлар бериш талаби билан чақиртирди», — дейилади хабарда. 

Шу билан бирга, Полша президенти Анжей Дуда матбуот анжуманида Полша ҳудудига қулаган ракетанинг Россияда ишлаб чиқарилганлигини тахмин қилган бўлса-да, аниқ далил йўқлигини айтди. «Айни пайтда бизда бу ракетани ким учиргани ҳақида аниқ далиллар йўқ. Суриштирув ҳаракатлари олиб борилмоқда. Катта эҳтимол билан бу Россияда ишлаб чиқарилган ракета бўлган», деб ёзган Дуда Twitter’да.

Полша давлати раҳбарининг идораси портлаш оқибатида икки киши ҳалок бўлганини тасдиқлади. Полша воқеа муносабати билан қуролли кучлар, жумладан, ҳаво ҳужумидан мудофаа кучларининг тайёргарлигини оширди, дея қўшимча қилди Дуда. 

15 ноябрь куни кечқурун Дуда Полшадаги портлаш муносабати билан НАТО бош котиби Йенс Столтенберг ва АҚШ президенти Жо Байден билан алоҳида телефон суҳбатлари ўтказди, деб хабар берди Полша президенти идораси. 

Столтенберг воқеани Дуда билан муҳокама қилганини тасдиқлади. «Мен инсонларнинг ҳалок бўлгани муносабати билан ҳамдардлик билдирдим. НАТО вазиятни кузатмоқда ва иттифоқчилар яқиндан маслаҳатлашмоқда. Барча фактлар аниқланиши муҳим», - деб ёзди у Twitter’да суҳбатдан сўнг. 

Оқ уй Байден ва Дуда кейинги қадамларни яқиндан мувофиқлаштиришга келишиб олганини айтди. «Президент Байден Қўшма Штатларга Полша бўйича терговда ҳар томонлама ёрдам беришни таклиф қилди. Президент Байден Қўшма Штатларнинг НАТОга содиқлигини яна бир бор тасдиқлади», - дейилади пресс-релизда. 

Дуда Америка етакчиси билан суҳбатдан сўнг Украина президенти Володимир Зеленскийга қўнғироқ қилди. «Мен Полша президенти Анжей Дуда билан гаплашдим. Полша фуқароларининг Россия ракета террори оқибатида ҳалок бўлгани муносабати билан ҳамдардлик билдирдим. Биз мавжуд маълумотларни алмашдик, барча фактларни аниқлаяпмиз. Украина, Полша, бутун Европа ва дунё Россиядан бутунлай ҳимояланган бўлиши керак», — деб ёзди Украина раҳбари Twitter’да. 

Бундан ташқари, Полша президенти Германия канцлери Олаф Шольц ва Буюк Британия бош вазири Риши Сунак билан телефон орқали мулоқот қилди. 

Шольц Дуда билан суҳбат чоғида ҳамдардлик билдирди, деб ёзди Германия ҳукумати вакили Штеффен Хебестрейт Twitter’да. «Полша кеча тунда мамлакатнинг икки фуқароси ҳалок бўлган воқеа ҳолатларини чуқур ўрганиб чиқади. Германия НАТОдаги ҳамкори - Полша томонида», - дейилади хабарда. 

«Буюк Британиянинг Полша билан бирдамлигини яна бир бор тасдиқладим ва ҳалок бўлганлар яқинларига ҳамдардлик билдирдим. Биз яқин алоқада бўлиб қоламиз ва НАТОдаги иттифоқчиларимиз билан ҳаракатларни мувофиқлаштиришда давом этамиз», деб ёзди Сунак суҳбатдан сўнг Twitter саҳифасида. 

Украина ташқи ишлар вазири Дмитрий Кулеба Россияни Полшадаги портлашга Украина зенит ракетаси сабаб бўлгани ҳақидаги «нотўғри» маълумот тарқатишда айблади. «Россия ҳозирда Украина ҳаво ҳужумидан мудофаа ракетаси Полша ҳудудига қулагани ҳақидаги фитна назариясини илгари сурмоқда. Бу тўғри эмас. Россия пропагандаси билан ўйнаш ёки унинг хабарларини тарқатиш керак эмас. Бу сабоқни анча олдин, MH17 уриб туширилгандан кейин олиш керак эди», деб ёзди у Twitter’да.

Ўз навбатида, Россия Мудофаа вазирлиги Полшадаги портлашларга алоқаси йўқлигини маълум қилди. «Украина-Полша давлат чегараси яқинидаги нишонларга Россиянинг йўқ қилиш воситалари билан ҳеч қандай зарба берилмаган», — дейилади Россия вазирлиги хабарида. 

Полша Хавфсизлик ва мудофаа бўйича ҳукумат қўмитаси йиғилиши якунлари бўйича мамлакат Миллий хавфсизлик бюроси раҳбари Яцек Севера Варшава Шимолий Атлантика альянси низомининг тўртинчи моддасидан фойдаланиш учун зарур шарт-шароитларни текшираётганини айтди. Бу альянсда иштирок этувчи мамлакатлардан бирининг «ҳудудий яхлитлиги, сиёсий мустақиллиги ёки хавфсизлиги»га таҳдид сезилган тақдирда НАТО аъзолари ўртасида қўшма маслаҳатлашувларни ўз ичига олади. 

Дуда 16 ноябрь куни мамлакат Миллий хавфсизлик кенгаши йиғилишини ўтказишга қарор қилди, деди Полша раҳбарининг идораси бошлиғи Павел Шрот. У соат 12:00 (Тошкент вақти билан 16:00) га режалаштирилган, деб ёзди Шрот Twitter’да.