АҚШ Конгресси Трампнинг солиқ декларациялари билан танишиб чиқади

АҚШ Олий суди Трампнинг солиқ ҳужжатлари Конгресс қўмитасига топширилишига йўл қўймаслик ҳақидаги илтимосини рад этди. Трамп қирқ йил ичида солиқ декларациясини ошкор этмаган АҚШнинг биринчи президенти бўлди.

АҚШнинг собиқ президенти Доналд Трамп солиқ ҳужжатларини АҚШ Конгрессига топшириш бўйича баҳсда мағлуб бўлди. АҚШ Олий суди 23 ноябрь, сешанба куни Трампнинг ушбу ҳужжатларни Вакиллар палатасининг молия қўмитасига ўтказишига тўсқинлик қилиш ҳақидаги илтимосини рад этди.

Республикачи Трамп кўп йиллар давомида солиқ декларациясини демократлар кўпчиликни ташкил этувчи Конгресс қўмитасига ўтказишга йўл қўймасликка уриниб келди ва энди барча қонуний имкониятларни тугатди. Демократлар АҚШ Олий судининг қароридан мамнун эканликларини билдирдилар. Трамп демократ конгрессменлар талабларини сиёсий асосга эга, деб атади.

Доналд Трамп 40 йил ичида анъанага зид равишда на президентликка номзод сифатида, на давлат раҳбари сифатида солиқ декларациясини эълон қилмаган биринчи АҚШ президенти бўлди. Вакиллар палатасининг Молия қўмитаси кўп йиллар давомида ушбу ҳужжатларни олишга уриниб келаётганди.

Трамп маъмурияти даврида Молия вазирлиги бунга йўл қўймади. Фақат демократ Жо Байденнинг Оқ уйга келиши билан Молия вазирлиги бу маълумотни ошкор қилишни буюрди, бироқ Трамп қаршилик кўрсатиб, турли ҳолатларда бу буйруққа қарши чиқди. Энди у уларнинг энг юқорисида - Олий судда мағлуб бўлди. 

Яқинда Доналд Трамп 2024 йилги АҚШ президентлиги учун яна ўз номзодини қўйиш ниятида эканлигини маълум қилди.