Европа Иттифоқи Туркияни Россияга қарши Ғарб санкцияларига риоя қилишга чақирди

Европа Иттифоқи Туркия ҳукуматини Россияга нисбатан савдо сиёсатини ўзгартиришга ва Ғарбнинг Украинадаги ҳарбий ҳаракатлар учун Москвага қарши жорий қилган санкцияларига риоя этишга чақирди. «Туркиянинг Европа Иттифоқининг Россияга нисбатан чекловчи чораларига қўшилмаслик сиёсати тобора хавотирга сабаб бўлмоқда», деди Европа Иттифоқининг ташқи ишлар ва хавфсизлик сиёсати бўйича олий вакили Жозеп Боррел 11 декабрь, якшанба куни Funke нашрлар гуруҳига берган интервьюсида.

Россиянинг Украинага ҳужуми бошланганидан кейин Туркия Россияга экспортни кескин оширди ва Россия нефтини харид қилишни кўпайтирди. Шу муносабат билан Боррел Европа Иттифоқи ва Туркия товарларнинг, жумладан, фуқаролик ва ҳарбий мақсадларда фойдаланиш мумкин бўлган икки томонлама мақсадли товарларнинг эркин ҳаракатланишини таъминловчи божхона иттифоқи тузганини таъкидлади.

Анқара Россияга Ғарб санкцияларини четлаб ўтишга ёрдам бермаслиги керак, дея таъкидлади Жозеп Боррел ва Туркия Европа Иттифоқига номзод мақомига эга эканлигини эслатиб ўтди. «Биз барча номзод давлатлар, жумладан Туркия ҳам кўрилган чораларга риоя қилишини кутамиз», — деди Европа дипломатияси раҳбари.

Боррелнинг сўзларига кўра, Россиянинг Украинага бўлган агрессияси фонида Туркия ва Россия ўртасидаги икки томонлама иқтисодий алоқаларнинг кенгайгани катта ташвиш уйғотмоқда. Европа Иттифоқи бир неча бор ўзининг шубҳа ва умидларини турк ҳамкорлари эътиборига ҳавола қилган ҳамда буни барча даражаларда давом эттиради, дея қўшимча қилди Жозеп Боррел.

Туркия ва Россия президентлари Ражаб Тоййиб Эрдўған ва Владимир Путин август ойида иқтисодий ҳамкорликни янада кенгайтиришга келишиб олган эди. Ғарб компаниялари ўз товарларини Россияга сотишда давом этиш учун Туркиядан бўшлиқ сифатида фойдаланаётган бўлиши мумкин. Бунинг учун АҚШ маъмурияти Туркияга иккинчи даражали санкциялар билан таҳдид қилган.