Давлат департаментида Путин урушни уруш деб атаганига эътибор қаратишди

«24 февралдан буён бутун дунё Путиннинг «махсус ҳарбий амалиёти» ҳеч қанақа амалиёт эмас, Украинага қарши уруш эканини билиб бўлди. Ниҳоят 300 кун ўтиб Путин воқеаларни ўз номи билан атай бошлади», деб Давлат департаменти вакилининг сўзларини келтирган Франс пресс.

«Ҳақиқатни тан олишнинг эндиги қадами сифатида Путинни урушни тугатиш ва Украинадан қўшинларни олиб чиқишга чақирамиз», деган департамент вакили.

Маълумот учун, Россияда урушни уруш деб аташ учун жавобгарлик жорий этилган. Мамлакатда Украинада давом этаётган босқинни «махсус ҳарбий амалиёт» деб аташ қабул қилинган.

Путин нима деди?

«Ҳаммаси 2014 йилги давлат тўнтаришидан бошланди. Майданда бўғирсоқ тарқатилган ўша ишларни ҳам АҚШ қўзғаганди, бу ҳақда кўп гапирганман. Бизнинг мақсадимиз бу ҳарбий можарони чўзиш эмас, урушни тугатиш. Биз шунга интиляпмиз ва интилишда давом этамиз», деди Путин 22 декабр куни Кремль пулидаги журналистлар билан учрашувда.

2014 йил Европа билан интеграциялашув шиори билан Украина президенти бўлган Виктор Янукович ўз халқига берган ваъдасини бажармади-да, Европа Иттифоқи билан келишувни имзоламай, ўрнига Россиядан катта миқдорда кредит олишга келишганди. Оқибатда украиналиклар Януковичнинг саройига бостириб кириб, уни ағдаришди. Янукович эса Россияга қочди ва ҳамон Ростовда яшаб келмоқда.

Ўша давлат тўнтаришидан кейин Россия Украинанинг Қрим яриморолини эгаллаб, ўз таркибига қўшиб олди. Кейинроқ эса Донбасснинг катта қисмида ўз назоратини ўрнатиб, 2022 йил 24 февралда бошланган уруш давомида Украинанинг Донецк ва Луҳанск вилоятларини эгаллаб олди.

Путин урушни «махсус ҳарбий амалиёт» эмас, уруш деб атаганига унинг Россиядаги танқидчилари ҳам эътибор қаратишди. Аммо уларнинг айтишича, Путин аввал ҳам «Уруш 2014 йилда бошланганди» қабилида гапирган. Кремл пропагандаси эса 24 февралда уруш бошлангач «Россия урушни бошламади, уни тугатади» мазмунидаги ғояни тарғиб қилиб келади.