Путин диверсантларга умрбод қамоқ жазоси бериш ҳақидаги қонунни имзолади

Россия президенти Владимир Путин 29 декабрь, пайшанба куни «диверсия таҳдидлари»дан ҳимояланиш тўғрисидаги қонунни имзолади. У Россия Федерацияси Жиноят кодексини «диверсия фаолияти» учун умрбод қамоқ жазосигача бўлган жазога оид янги моддалар билан тўлдиради.

Россия Федерацияси Жиноят кодексида учта янги модда пайдо бўлди - «диверсия фаолиятига ёрдам бериш» (10 йилдан 20 йилгача озодликдан маҳрум қилиш ёки умрбод озодликдан маҳрум қилиш), «диверсия фаолиятини амалга ошириш мақсадида ўқитиш» ва «қўпорувчилик жамияти фаолиятини ташкил этиш» (15 йилдан 20 йилгача озодликдан маҳрум қилиш ёки умрбод), шунингдек, бундай жамиятда қатнашиш (беш йилдан 10 йилгача озодликдан маҳрум қилиш).

Россиянинг Украинада ҳарбий ҳаракатлари бошланганидан кейин Россия Федерациясида ҳарбий комиссарликлар ва бошқа маъмурий биноларга ўт қўйиш тўлқини юз берди. Ёзга келиб, ҳужумларнинг интенсивлиги пасайди, аммо мамлакатда «қисман сафарбарлик» эълон қилингач, ўт қўйиш янги куч билан бошланди. "Медиазона" маълумотларига кўра, ноябрь ойи бошига қадар Россияда маъмурий биноларга камида 75 та ҳужум қилинган, 52 та ҳолатда ўт қўйиш объекти ҳарбий комиссарликлар ва чақирув марказлари бўлган.