Россияда танқидчи Троицкий ва актёр Смолянинов «хорижий агент» деб тан олинди

13 январь, жума куни Россия Адлия вазирлиги мусиқий танқидчи Артемий Троицкий ва актёр Артур Смоляниновни «хорижий агентлар» реестрига киритди.

Троицкий 2014 йилдан бери Таллинда яшаб, у ерда дарс беради. 24 февралда, Украинага кенг кўламли босқин бошланган кун, у Россия агрессиясига қарши чиқди. «Мен севган ва бой бераётган Россия учун жуда афсусдаман. Замонавий дунё Путиннинг ўрта аср вабосини енгиб ўтишига шубҳа йўқ, лекин қон тўкилиши камроқ бўлишини истардим», деб ёзган ўша куни у.

Артур Смолянинов 2022 йилнинг ёзида Россияни тарк этган, у аввалроқ Россиянинг Украинага бостириб киришини кескин танқид қилиб, бир неча интервью берганди. Октябрь ойида унга қарши Россия армиясини «обрўсизлантириш» тўғрисида протокол тузилди. Январь ойи бошида «Новая газета.Европа» нашрига берган интервьюсида у агар урушда қатнашиши керак бўлса, Украина томонида жанг қилиши ва «Россиядан нима қолиши» уни қизиқтирмаслигини айтди. Бундан ташқари, Артур Смолянинов «Фуқаро шоир» сиёсий сатирик лойиҳасини қайта бошлашда иштирок этяпти ҳамда Чўлпон Хаматова билан биргаликда «Ногу Свело» гуруҳининг «Янги йил билан, ўғлим» клипида рол ўйнади, у ерда россиялик оилавий жуфтлик урушда ҳалок бўлган ўғлининг фотосурати билан янги йилни кутиб олиши акс этган.

13 январь куни Троицкий ва Смоляниновдан ташқари Навалнийнинг Пермдаги штаби собиқ раҳбари Сергей Ухов, блогер ва собиқ руҳоний Сергей Кирсанов, адвокат Анатолий Фурсов ҳамда украиналик телебошловчи Александр Шелест ҳам «хорижий агент» сифатида тан олинди.