Штайнмайер: Путин Украинадан қўшинларни олиб чиқиши керак

Германия президентининг сўзларига кўра, «Россия ўзининг жиноий урушида ғалаба бўлиши мумкин эмаслигини тушуниши керак». 

Германия бошқа Европа давлатлари билан солиштирганда Киевга энг катта ёрдам беряпти. Бу ҳақда Германия президенти Франк-Валтер Штайнмайер маълум қилди. У 24 февраль, жума куни Бельвю президентлик саройида Россиянинг Украинага кенг кўламли бостириб кириши бир йиллигига бағишланган нутқ сўзлади. 

«Сиз Германияга ишонишингиз мумкин», деди Штайнмайер. «Барча баҳсли ва баъзан нохуш мунозараларга қарамай, биз Украинанинг Европадаги энг йирик ҳамкори бўлиб қоламиз, деб ишонаман», дея қўшимча қилди у. 

Германия президентининг сўзларига кўра, Иккинчи жаҳон урушидан кейин биринчи марта Европанинг марказида яна агрессив кампания авж олмоқда. «Россия Украинанинг мавжуд бўлиш ҳуқуқини рад этяпти, у Украинани мустақил давлат сифатида йўқ қилишни хоҳлайди», деди сиёсатчи. 

Франк-Валтер Штайнмайер Россия етакчиси Владимир Путин учун чегаралар дахлсизлиги, мамлакат суверенитети ва ўз тақдирини ўзи белгилаши, инсон қадр-қиммати ва тинчлиги, меъёр ва қонунларга риоя қилиш ҳеч нарсани англатмаслигини таъкидлади. «Европада бирга яшашимиз асосига қурилган ҳамма нарса унинг учун муҳим эмас», деди у ва Россиянинг босқинчилик уруши Европа хавфсизлиги тартибини вайронага айлантирганини қўшимча қилди. «Бу дунё икки жаҳон урушидан олган барча сабоқларга ҳужумдир», деб хулоса қилди Германия президенти. 

Шу билан бирга, у урушни чўзаётган Ғарбнинг ҳарбий ёрдами эмас, балки «тинчликдан воз кечаётган» Россия эканлигини таъкидлади. Штайнмайернинг ишонч билдиришича, «Путин урушни тўхтатишга жиддий қараса, Украинадан қўшинларни олиб чиқиб кетиши керак». «Россия ўзининг жиноий урушида ғалаба бўлиши мумкин эмаслигини тушуниши керак», - деди у. Сиёсатчининг сўзларига кўра, «ким ўлдиришга, Украинани бомбардимон қилишга, шаҳарларни вайрон қилишга ва болаларни ўғирлашга йўл қўйса, аскарлари кундан кунга бемаъни қон тўкаётган бўлса, у тарихда ҳеч қачон ғолиб бўлмайди, у аллақачон мағлуб бўлган!»