Чусовитина жаҳон кубогида кумуш медалга сазовор бўлди

Спорт гимнастикаси бўйича Ўзбекистон терма жамоаси аъзоси Оксана Чусовитина Бокуда ўтаётган жаҳон кубогининг учинчи босқичини медал билан якунлади. У таяниб сакраш дастурида кумуш медални қўлга киритди.

Икки уриниш натижасига кўра, Оксана Чусовитинанинг чиқиши ҳакамлар томонидан 13.433 балл билан баҳоланди. У фақатгина франциялик Колин Деваллардан камроқ балл тўплади. 

Шу тариқа, спортчи қаторасига учинчи бор жаҳон кубогида шоҳсупага кўтарилмоқда. Бундан аввалги босқичларда у бронза медалига сазовор бўлган эди.

Таяниб сакраш, аёллар:

• Колин Деваллар (Франция) – 13.683;
• Оксана Чусовитина (Ўзбекистон) – 13.433;
• Линмин Ю (Хитой) – 13.383.