Полша элчининг «урушда иштирок этиш» ҳақидаги сўзларига аниқлик киритди

Полшанинг Франциядаги элчихонаси элчи Ян Эмерик Ростишевскийнинг «Агар Украина ўз мустақиллигини ҳимоя қила олмаса, бизда (Полша) бошқа чора қолмайди, биз урушда иштирок этишга мажбур бўламиз», деган сўзларига аниқлик киритди. Дипломатик миссиянинг 19 март, якшанба куни тарқатган баёнотига кўра, айрим оммавий ахборот воситалари бу сўзларни «контекстдан олинган ҳолда» нотўғри талқин қилган.

Элчихонанинг таъкидлашича, ярим соатлик суҳбат давомида элчи иттифоқчилар томонидан Украинани қўллаб-қувватлаш зарурлиги ва «Россия Европа ва Европа қадриятларига таҳдид солаётгани» ҳақида гапирган. «Суҳбатни диққат билан тинглаш шуни кўрсатадики, Полшанинг можарода бевосита иштироки ҳақида ҳеч қандай баёнот йўқ, фақат Украина мағлубияти оқибатлари, Россия ҳужуми эҳтимоли ёки Марказий Европанинг бошқа давлатлари – Болтиқбўйи мамлакатлари ва Полшанинг урушда иштирок этиши мумкинлиги ҳақида огоҳлантириш бўлган, холос», - дея таъкидлади дипломатик миссия.

Полшанинг собиқ президенти Лех Качиньский ҳам ўтмишда вазиятга худди шундай баҳо берган ва элчининг баёнотидан келтирилган парчани «шу маънода тушуниш керак», дея қўшимча қилган элчихона.

«Бошқа парчаларда элчи Полша уруш ҳолатида эмаслигини, балки Украинага ушбу можарода ўзини ҳимоя қилиш учун ҳамма нарсада ёрдам беришини аниқ тушунтирган», дея маълум қилди дипломатик миссия ва «Полшанинг изчил уринишларига тўғри келмайдиган шов-шувли баёнот излашни дўстона ҳаракат эмас» деб атади. 

Аввалроқ Полша элчиси LCI телеканалига берган интервьюсида «Агар Украина ўз мустақиллигини ҳимоя қила олмаса, бизда бошқа чора қолмайди, биз можарога киришга мажбур бўламиз», деб айтган эди. Полша ташқи ишлар вазири ўринбосари Павел Яблонский Полша оммавий ахборот воситалари билан суҳбатда элчи «қандайдир урушга киришиш истаги» ҳақида гапирмаганини, балки Полша ҳам маълум сценарийлар остида Россия ҳужуми қурбонига айланиши мумкинлигини таъкидлади. «Менимча, элчи айнан шуни назарда тутган эди», деди у.

Растишевскийнинг сўзлари Полша парламентида кескин танқид қилинди. «Агар Украина бардош бера олмаса, биз Россияга қарши урушга кирамиз, деган Полшанинг Франциядаги элчиси ўз ваколатидан ошиб кетяпти ва шунчаки ўз лавозимидан четлатилиши керак», — деди парламентнинг ташқи ишлар бўйича қўмитаси аъзоси Мацей Гдула.