Туркияда 14 май куни президентлик сайловлари бўлиб ўтади. Ражаб Тоййиб Эрдўған янги муддатга сайланиш учун ўз номзодини қўйган, бироқ у ютқазиши мумкин. Амалдаги президентнинг асосий рақиби 74 ёшли мухолифат номзоди, Туркия парламенти депутати, Республика Халқ партияси етакчиси Камол Қиличдорўғлидир. Сўровномалар шуни кўрсатмоқдаки, у ва Эрдўғаннинг ғалаба қозониш имкониятлари тахминан тенг. Қиличдорўғли ҳатто кичик фарқ билан етакчилик ҳам қилмоқда. Metropoll томонидан апрел ойида ўтказилган сўровномалар натижаларига кўра, сайловчиларнинг 42,6 фоизи Қиличдорўғлига овоз беришга тайёр, 41,1 фоизи эса Эрдўғанни қўллаб-қувватламоқчи.
Сайловда яна икки номзод рўйхатга олинган. Улар Memleket (Она юрт) партияси етакчиси Муҳаррем Инже ва Туркия парламентининг собиқ депутати Синан Ўган. Сўровномаларга кўра, сайловчиларнинг 5 фоизи Инжега, 2 фоиздан сал кўпроғи Ўганга овоз бериш ниятида.
Камол Қиличдорўғли «репрессив тузумга демократик йўл билан чек қўйиш»га чақирмоқда. «Бу демократияни авторитар бошқарувдан ҳимоя қилувчилар сайловидир», деган у Time журналига берган интервюсида. Қиличдорўғли Туркияни 2018 йилгача мавжуд бўлган парламент республикаси бошқарув шаклига қайтариш тарафдори. 2017 йил ўтказилган конституциявий референдум натижаларига кўра, Туркия президентлик республикасига ўтиши бўйича қарор маъқулланганди.
Depo Photos / ZUMA Press Wire / Scanpix / LETA
Қиличдорўғлининг фикрича, Туркия Россия ва Украина ўртасидаги можарода «воситачи» бўлиб қолиши керак. Бу ҳақда унинг маслаҳатчиси Унал Чевикоз Politico нашрига маълум қилган. Шу билан бирга, у Туркия «Россия энергия ташувчилари импортига жуда боғланиб қолгани учун» Россия билан «номутаносиб» муносабатларни ривожлантирганини таъкидлаган.
«Биз Туркиянинг НАТО аъзоси эканига урғу берамиз. Россия билан музокараларимизда биз, албатта, тенг ҳуқуқли муносабатларга интиламиз, лекин Россияга Туркия НАТОнинг бир қисми эканини эслатамиз», — деган Қиличдорўғлининг маслаҳатчиси.
Туркиядаги президентлик сайловларига олти ой қолганда Эрдўғаннинг энг асосий рақиби бўлиши кутилган Истанбул мэри Акром Имомўғли суд томонидан айбланганди.
