«Албатта, барчамиз бу ерда бошқа Владимирни кўришни хоҳлаймиз» – Зеленский Ҳаага судида нутқ сўзлади

Украина президенти Володимир Зеленский Нидерландиянинг Ҳаага шаҳрида жойлашган Халқаро жиноят судида нутқ сўзлади. Бу суд март ойида Россия президенти Владимир Путинни ҳибсга олишга ордер берганди.

Зеленский Ҳаага шаҳрига Финландияга амалга оширган ташрифини якунлаганидан кейин етиб борди. Суднинг анжуманлар залига кираверишда Украина етакчисини олқишлар билан кутиб олишди. Зеленский Ҳаагада Кремлга дрон ҳужуми амалга оширилиши, Россия бу ишда Киевни айблаб Запорижжя, Одесса ва Киевга давомли зарбалар бергани фонида нутқ сўзлади.

«Албатта, барчамиз бу ерда қилган жиноятлари учун жазоланишга муносиб бўлган бошқа Владимирни кўришни истаймиз. Ишончим комилки, биз ғалаба қозонганимиздан кейин бу иш содир бўлади», деди Зеленский сўзининг бошида «бошқа Владимир» деганда Россия президенти Владимир Путинга ишора қилиб.

Март ойида Ҳаагадаги Халқаро жиноят суди Россия президентини ва Россия болалар ҳуқуқлари бўйича омбудсмани Мария Лвова-Беловани ҳибсга олишга ордер чиқарган, бунга сабаб сифатида улар украиналик болаларни ноқонуний тарзда Россияга депортация қилишда иштирок этишда гумонланаётгани келтирилганди.

Ҳаагада чиқиш қилган Володимир Зеленскийнинг сўзларига кўра, россияликлар томонидан Украинада апрел ойининг ўзида 6139 та ҳарбий жиноят содир этилган, уларнинг оқибатида 207 нафар тинч аҳоли вакиллари, жумладан, 11 нафар бола ҳалок бўлган. Зеленский 3 май куни Россиянинг Херсонга амалга оширган ракета зарбасига ҳам урғу бериб, зарбалар оқибатида 23 киши ҳалок бўлгани, 49 киши яраланганини маълум қилди.

Зеленский бу урушда довга фақат битта давлатнинг тақдири тикилмаганини таъкидлади: «Биз тажовузкор урушни тўхтата олмасмиз, аммо тажовузнинг ўзини қонунсизликка ўрганган инсоннинг шуурида шаклланадиган жиноий ғоя сифатида мағлуб эта оламиз. Ҳар қандай тажовузкор урушга назар солсангиз, уларни боғлайдиган бир жиҳатни кўрасиз: уруш айбдорлари қачондир қилган ишлари учун жавоб бериши муқаррарлиги ҳақида ўйлаб ҳам кўрмайди», деди Зеленский.

Украина президенти нутқи давомида кўп марта трибунал ҳақида гапириб, фақат трибунал бу агрессив жиноятлар учун муносиб жазо бера олишини айтди. «Украина судлари россиялик босқинчилар қилган жиноятлари учун жавобгарликка тортилишини таъминлашини кафолатлайман», деди Зеленский.

У нутқи давомида бир неча марта иккинчи жаҳон урушидан кейин фашистлар Германияси вакиллари Нюрнберг ҳарбий трибуналида суд қилинганини эслади.

«Жазосизлик агрессияга йўл очади. Нюрнберг жараёнини бугун ҳам реалликка айлантиришимиз керак. Биз бундай трибунал тузилишини қўллаймиз. Бу иш шу ерда, адолат пойтахтида амалга ошиши лозим. Дунёни қўрқмасликка чақираман, агрессор адолат нималигини тўлалигича ҳис қилсин. Бутун дунё ўзини хавфсизликда ҳис қилишга ҳақли», деди Зеленский.

Украина етакчиси нутқи давомида адолат учун курашаётган Халқаро судга ва Украинага қурол етказиб бераётган Нидерландия ҳукуматига миннатдорчилик билдирди. Зеленскийнинг нутқи якунида айтган мана бу гапи эса олқишлар билан кутиб олинди: «Бу биз бошланишини истамаган уруш. Аммо энди шундай қилишимиз керакки, бу охирги уруш бўлсин».

Зеленский Ҳаагадаги чиқишида барча урушларда ҳалок бўлганлар хотирасига сукут сақлашни илтимос қилди: «Келинг, бугун ҳам ҳар йили 4 майда бўлгани каби барча урушларда ҳалок бўлганларни ёд этайлик. Илтимос, агар мана шу агрессия бўлмаса, бугун тирик қолиши мумкин бўлган украиналикларни ҳам эсланг», деди Украина президенти.

«Уруш вақтида мамлакатдан чиқиш осон эмас»

Украина президенти уруш вақтида мамлакатни қисқа муддатга бўлса-да тарк этиш осон бўлмагани, бу ташрифлари украиналиклар ва ҳарбийларнинг мотивациясини камайтиришидан чўчиётганини ҳам яширмади. «Қисқа муддатга бўлса-да мамлакатдан чиқиб кетяпман. Чунки бу жуда муҳим. Мен тайёргарлик учун, жанг майдонида янада кучли бўлишимиз, россияликларга баъзи совуқ хабарлар етказиш учун шундай қиляпман. Кеча Финландияда эдим, бугун Ҳаагадаман – адолатга жуда яқинман», деди Зеленский.

Қарши ҳужум ҳақида

Зеленский Украинанинг қарши ҳужуми ҳақида ҳам гапирди.

«Биз қарши ҳужумнинг муваффақиятли бўлишига ишонамиз ва бунинг учун қўлимиздан келганини қиламиз. Нафақат ҳарбийларимиз, балки заводларимиз, ишлаб чиқарувчилар бутун халқимиз армия янада кучлироқ бўлиши учун ҳаракат қилмоқда.

Қарши ҳужумга жиддий тайёрланяпмиз ва унда муваффақият қозона олмаслигимиз ҳақида ўйламаяпмиз, биз бунга ўрганмаганмиз. Мен 100 фоизлик кафолат бера олмайман, бунинг имкони йўқ. Бундан ташқари, кўплаб одам йўқотаётган вақтда қандай муваффақият ҳақида гапириш мумкин? Аммо нима бўлганда ҳам биз фақат олға борамиз ва ҳамкорларимиздан ёрдам кутиб қоламиз», деди Зеленский.