Бундан 11 йил олдин, “Умид ниҳоллари-2012” спорт мусобақаларининг финал босқичи ўтказилиши муносабати билан Навоий шаҳрида қарийб 20 млрд сўм (ўша пайтдаги курс бўйича тахминан 11 млн АҚШ доллари) миқдорда давлат бюджети маблағлари ҳисобига “Ёшлар” спорт мажмуаси барпо этилганди. Умумий ҳудуди 15 гектарни ташкил қилувчи мажмуада спортнинг ўндан ортиқ тури бўйича машғулот олиб бориш имкониятлари мавжуд.
Кўплаб спорт турлари бўйича Ўзбекистон, Осиё ва жаҳон чемпионлари етишиб чиққан спорт мажмуасининг катта қисми ҳукумат фармойиши билан “Қизилқум” футбол жамоаси балансига бепул ўтказиб берилиши кутиляпти. Мажмуада машғулот олиб борувчи юзлаб спортчилар, уларнинг мураббийлари ва ота-оналари, ишчи-ходимлар бундан норози.
“Ёшлар” спорт мажмуаси ҳозирги кунда Навоий вилояти спортнинг ўйин турлари ва енгил атлетикага ихтисослаштирилган спорт мактаби балансида. Мажмуани сақлаб туриш ҳаражатларининг бир қисми давлат бюджети, қолган қисми ихтисослаштирилган спорт мактаби маблағлари ҳисобидан амалга оширилади.
Ихтисослаштирилган спорт мактабида 10 та олимпия спорт туридан бўлимлар (енгил атлетика, футбол, волейбол, баскетбол, гандбол, чим устида хоккей, теннис, бадминтон, стол тенниси, регби-7) фаолият кўрсатади. Уларда 31 нафар малакали тренер ўқитувчилар назорати остида 486 нафар спортчи машғулот олиб боради. Спортчилар орасидан кўплаб чемпионлар, юқоридаги спорт турларидан миллий терма жамоа аъзолари етишиб чиққан.
“Спорт мажмуамиз шаҳарнинг марказий ўйингоҳи ҳисобланади. Унда стандартга мос футбол майдонлари, вилоятда ягона бўлган резин қопламали югуриш йўлаклари, иккита универсал зал мавжуд. Ҳозирги кунда ушбу яратилган шароитлардан спортнинг олимпия туркумига кирувчи енгил атлетика, футбол, регби-7, чим устида хоккей ва паратлетика каби турларидан юзлаб спортчилар фойдаланиб, шуғулланиб келишмоқда.
