Россия Ташқи ишлар вазирлиги буйруғи лойиҳасига кўра, чет эл фуқаролиги ёки яшаш учун рухсатномага эга бўлган россияликлар бу ҳақда Россиянинг хориждаги дипломатик ваколатхоналарини хабардор қилишлари мумкин.
Бошқа давлатнинг фуқаролиги, яшаш учун рухсатномаси ёки «хорижий давлат ҳудудида доимий яшаш ҳуқуқини тасдиқловчи бошқа ҳужжати» бўлган россияликлар куздан шу ҳақда Россия элчихонаси ёки консуллигини хабардор қилиши мумкин. Бу regulation.gov.ru сайтида 13 июль, пайшанба куни эълон қилинган Россия Ташқи ишлар вазирлиги буйруғи лойиҳасида айтилган.
Россия фуқаролари тегишли ҳужжатларни олган кундан бошлаб 60 календар кун ичида чет эл фуқаролиги ёки яшаш учун рухсатномаси тўғрисида Россиянинг чет элдаги дипломатик ваколатхонасини хабардор қилиши таклиф этилади. Худди шу муддат Россиянинг чет элдаги дипломатик ваколатхоналарини бошқа давлат фуқаролиги ёки яшаш учун рухсатномани йўқотгани тўғрисида хабардор қилишда ҳам амалда бўлади.
Россиянинг 18 ёшдан ошган фуқаролари билдиришномаларни шахсан ёки вакил орқали «Россия қонунчилигига мувофиқ нотариал тасдиқланган» ишончнома билан, вояга етмаганлар ёки муомалага лаёқатсиз фуқаролар эса - ўз қонуний вакиллари орқали тақдим этиши мумкин.
Буйруқ муаллифлари хабар бериш тартибини 2023 йил 26 октябрдан кучга киритишни таклиф қилмоқда. Россиянинг дипломатик ваколатхоналари бошқа давлат фуқаролиги ёки чет элда яшаш учун рухсатнома мавжудлиги тўғрисида хабардор қилинмаган тақдирда қандай жазо берилиши ҳақида буйруқда айтилмаган.
04.06.2014 йилдаги 142-ФЗ-сонли федерал қонунга кўра, чет эл фуқаролигини, яшаш учун рухсатномани ёки чет элда доимий пропискани олгандан сўнг, фуқаро Россия Ички ишлар вазирлигини ҳужжатни олган санасидан «олтмиш кун ичида» хабардор қилиши шарт. Ушбу қоида чет элда доимий яшовчи ва Россияга ташриф буюрмаган россияликларга тааллуқли эмас.
Ушбу талабни бажармаслик, Россия Жиноят кодекси нормаларига мувофиқ, икки юз минг рублгача жарима ёки озодликдан маҳрум этилган маҳкумнинг бир йилгача бўлган муддатга иш ҳақи ёки бошқа даромадлари миқдорида жарима солишга сабаб бўлади.
Хабардор қилиш тартибини бузганлик учун россиялик 500 рублдан 1000 рублгача жаримага тортилиши мумкин.
