Мусобақада Покистон, Қозоғистон, Эрон, Тожикистон ва Ўзбекистондан 156 нафар ёш волейболчи иштирок этмоқда.
Марказий Осиё чемпионатида волейбол бўйича 16 ёшгача бўлган спортчилар миллий терма жамоалари қатнашмоқда. 14 июль куни ўртасида мусобақанинг очилиш маросими бўлиб ўтди.
ИИВ “ЖАР” спорт-соғломлаштириш комплекси мезбонлик қилаётган мусобақанинг очилиш маросимида Волейбол федерацияси, Марказий Осиё волейбол ассоциацияси раҳбарлари ҳамда вазирлик ва идора вакиллари, шунингдек спорт жамоатчилиги иштирок этди.
Мусобақада Покистон, Қозоғистон, Эрон, Тожикистон ва Ўзбекистон терма жамоалари таркибидаги 156 нафар ёш волейболчи ғолиблик учун баҳс олиб боришади. Тантанали очилиш маросимида меҳмонларга чемпионат иштирокчилари таништирилиб, ташкилотчи ва Марказий Осиё волейбол ассоциацияси раҳбарлари сўз олиб жамоаларга омад тилашди.
Марказий Осиё чемпионати жорий йилнинг 20-30 июль кунлари U-16 ёшгача бўлган эркаклар миллий терма жамоалари ўртасида биринчи бор ўтказиладиган Осиё чемпионатига тайёргарлик вазифасини ҳам ўтайди. Ушбу мусобақа ҳам “ЖАР” спорт мажмуасида ўтказилади. Осиё чемпионатида қитъанинг 20 та давлат терма жамоалари иштирок этиши кутилмоқда.
Ўғил ва қиз болалар ўртасида ўтказилаётган Марказий Осиё чемпионати баҳслари 19 июль санасида ниҳоясига етади. 20-30 июль кунлари эса 16 ёшгача бўлган ўсмирлар ўртасида Осиё чемпионати баҳслари бўлиб ўтади.
