Блинкен: F-16 қирувчи самолётларини Украинага топширишга бир неча ой кетади

Давлат котибининг сўзларига кўра, F-16 қирувчи самолётларини Киевга бериш тўғрисидаги қарор дарҳол қабул қилинган тақдирда ҳам, етказиб бериш ва тайёрлаш учун бир неча ой керак бўлади.

Фото: Globallookpress

Украина F-16 қирувчиларини қабул қилади, бироқ уларни етказиб бериш бир неча ой давом этади – қарор қачон қабул қилинишидан қатъи назар, дея маълумот берди 23 ию, якшанба куни АҚШ давлат котиби Энтони Блинкен CNN телеканалига интервьюсида.

«Гап тайёргарлик, техник хизмат кўрсатиш, уларни қўшма қуролли операцияларда қўллаш қобилиятига эга бўлиш ҳақида кетяпти. Буларнинг барчаси вақт талаб этади. F-16 бўйича қарор эртага қабул қилинган тақдирда ҳам, улар қўллана бошланишига бир неча ой керак бўлади», деб тушунтирди Блинкен.

Украина Америка қирувчи самолётларини олишига ишонасизми, деган саволга давлат котиби ижобий жавоб берди. Блинкен «F-16 жараёни олдинга силжишини» таъкидлаб: «уларни қабул қилганларида тўғри ўқитилиши, бу самолётларга хизмат қила олиши ва улардан оқилона фойдаланишига эътибор қаратиш муҳим» деди.

Июль ойи бошида Оқ уй Миллий хавфсизлик кенгаши матбуот котиби Жон Кирби Америкада ишлаб чиқарилган F-16 қирувчи самолётлари жорий йил охирига келиб Украинага етиб келишини айтган эди.

«Мана, F-16 самолётлари йил охиригача етиб бориши мумкин. Лекин биз F-16 самолётларининг ўзи вазиятни ўзгартириш учун етарли эмас деб ўйлаймиз», деди у Fox News телеканалига.