Португалия ва Испанияда ўрмон ёнғинлари. Пиренейда аномал иссиқнинг учинчи тўлқини кузатилмоқда

Португалия фуқаролик мудофааси миллий бошқармаси маълумотларига кўра, мамлакатнинг марказий ва жанубий қисмларида ёнғинга қарши кураш ишлари учун мингдан ортиқ ўт ўчирувчи ва 12 самолёт жалб этилган.

Айни вақтда 800 дан ортиқ ўт ўчирувчи қарши курашаётган ўрмон ёнғини шанба куни Алентежу регионидаги Одемира муниципалитетида бошланган, аммо кейин жанубга, Португалиянинг асосий сайёҳлик йўналишларидан саналган Алгарве томон йўналган.

Юқори ҳарорат ва кучли шамол олов билан курашишни қийинлаштирмоқда, ёнғин аллақачон етти минг гектарга яқин майдондаги ўрмонларни йўқ қилган. Душанба куни кечқурун Одемира осмони қорайган ва ҳавога улкан тутун булути кўтарилган. Одемира шаҳри мэри Ҳелдер Геррейро вазият критик даражада эканини маълум қилган.

Расмийларнинг хабарларига кўра, хавфсизлик нуқтайи назаридан 19 кишлоқ, тўртта сайёҳлик базаси ва кемпинг эвакуация қилинган. Бир қанча йўллар, жумладан Лиссабон ва Портуни боғловчи А1 трассасининг бир қисми ёпилган.

Кўплаб олимлар ўрмон ёнғинларини инсон фаолияти ҳисобига кучайган иқлим ўзгаришлари билан боғлашади. 
Ва Испания ва Португалияда бу ёзда ёнғинлар кўлами одатдаги узоқ муддатли ўртача кўрсаткичлардан пастроқ бўлса-да, компютер моделлари кўрсатишича, келажакда иссиқлик тўлқинлари частотаси катта эҳтимол билан ошади. Табиийки, зарур ҳимоя чоралари кўрилмаса, ўрмон ёнғинлари юзага келиши хавфи ҳам ортади.

Олимларнинг баҳоларига кўра, саноатлашиш даври бошланганидан буён Ер юзида ўртача ҳарорат тахминан Целсий бўйича 1,1 даражага кўтарилган ва яқин келажакда ҳам кўтарилишда давом этади.

Бу ҳафта Пиреней яриморолининг катта қисмида ҳарорат +40°C дан юқори бўлиши кутилмоқда.

Душанба куни Сантарен шаҳридаги метеостанция бу йилдаги энг юқори ҳароратни қайд этди – 46,4°C.

Душанба куни Португалия метеорология агентлиги IPMA мамлакатнинг олти ҳудуди, жумладан Лиссабонда, жазираманинг янги тўлқини яқинлашаётгани муносабати билан «қизил тревога» эълон қилди.

Ҳукумат Португалиянинг 120 дан ортиқ муниципалитетларда ўрмон ёнғинлари хавфи юқори эканини эълон қилди.

Душанба куни Испанияда учта ўрмон ёнғинини назоратга олишга муваффақ бўлинди, дам олиш кунлари бу ёнғин ўчоқлари 1000 гектардан ортиқ ҳудуддаги ўрмонларни йўқ қилган, аммо мамлакатнинг кўплаб ҳудудларида ҳали ҳам жазирама сақланиб қолмоқда: Испанияга шу ёзнинг ўзида аномал иссиқнинг учинчи тўлқини ёпирилган.

Испания метеорология агентлиги Aemet маълумотига кўра, жанубдаги Андалусия, марказдаги Кастилия-Ла-Манче ва ғарбдаги Эстремадурада хавфнинг тўқсариқранг даражаси эълон қилинди, чунки бу ҳафта айрим жойларда ҳаво ҳарорати +43 даражага чиқиши кутилмоқда.

Infoca ўт ўчириш хизматига кўра, якшанба куни Атлантика океани соҳилидаги Кадис шаҳридан (бу Испаниянинг сайёҳлар орасида машҳур бўлган жойларидан бири) 10 км масофада чиққан ёнғин яримтунда ўчирилган.

Дам олиш кунлари Уэлва шаҳридан жануби-ғарбдаги 450 гектар майдонни қамраб олган бошқа бир ёнғин ҳам айни вақтга келиб назорат остига олинган.

Душанба куни Каталония ўт ўчирувчилари региондаги ёнғин ўчоғи аллақачон назоратга олингани ҳақида маълум қилди, аммо ўрмон хўжалиги вакилининг сўзларимга кўра, 600 гектар ҳудуддаги ўрмонлар ёнаётган жойларда ҳамон 30 га яқин ўт ўчирувчилар бўлинмалари қолаётганини билдирган.

Каталония ва Андалусия – ёнғин пайдо бўлиши учун шароит яратадиган қурғоқчиликдан энг кўп азият чекадиган икки региондир.

Европа ўрмон ёнғинлари ахборот тизими Effis маълумотларига кўра, йил бошидан буён Испанияда 70 минг гектардан ортиқ ўрмон ва бутазорлар ёниб кетган. Бу борада мутлақ рекорд ўтган йили қайд этилганди, ўшанда ёнғинлар 300 минг гектар ерни қамраб олганди.