Кучли иссиқ Европада ўрмон ёнғинларини кучайтирди

Европанинг бир қатор давлатларида сўнгги кунларда йирик ўрмон ёнғинлари юз бериб, минглаб гектар яшил ҳудудлар ёниб кетди. Франция, Испания, Португалия ва Грецияда ёнғинларни бартараф этиш учун юзлаб ўт ўчирувчилар, махсус техника ва авиация жалб этилган. Франция жанубида икки киши жабрланган, беш минг нафар аҳоли эвакуация қилинган.

Фото: Castoldi Isabelle/ABACAPRESS/IMAGO

Франциянинг Шарқий Пиреней департаментида ёнғин 4 июл куни кечқурун Перпинян шаҳри яқинидаги етиб бориш қийин бўлган тоғли ҳудудда бошланган.

AFP агентлиги маълумотига кўра, ёнғинни ўчириш ишларига 700 нафарга яқин ўт ўчирувчи, 200 та махсус техника, шунингдек ўнга яқин самолёт ва вертолёт жалб қилинган. Ҳодиса оқибатида бир нафар ўт ўчирувчи ва маҳаллий аҳолидан бир киши оғир жароҳат олган.

Шарқий Пиреней маъмурияти хавфсизлик нуқтаи назаридан беш минг нафар аҳолини эвакуация қилиш тўғрисида қарор қабул қилди. Департамент префекти Рено де ла Мот бу ёнғинни «мисли кўрилмаган кўламдаги офат» деб баҳолаб, уни бартараф этиш учун барча давлат хизматлари сафарбар этилганини билдирди.

Франциянинг яна 41 та департаментида 6 июл куни ҳам ёнғин хавфи юқори даражада сақланиб қолмоқда. Улардан еттитасида энг юқори хавф даражаси эълон қилинган.

Грецияда йирик ёнғин Салоники шаҳри яқинидаги чиқиндиларни қайта ишлаш заводида бошланган. Қалин қора тутун шаҳар марказигача етиб боргани сабабли маҳаллий ҳокимият аҳолини уйларида қолиш, дераза ва эшикларни ёпиш ҳамда ҳаводаги заҳарли моддалар туфайли ташқарига чиқмасликка чақирган.

Шунингдек, учта аҳоли пункти ва доимий парваришга муҳтож 157 нафар киши яшайдиган муассаса эвакуация қилинган. Маҳаллий полиция эҳтиётсизлик оқибатида ёнғинга сабаб бўлганликда гумон қилиниб, 76 ёшли эркакни қўлга олган.

Греция пойтахти Афина шаҳрининг ғарбий қисмида ҳам йирик ўрмон ёнғини қайд этилган. Ёнғинни ўчириш ишларида 210 нафар ўт ўчирувчи, кўнгиллилар ва махсус авиация иштирок этмоқда.

Испаниянинг Жирона вилоятида эса ёнғин 3 июлдан бери давом этмоқда. EFE агентлиги маълумотига кўра, ёнғин қарийб 2 200 гектар майдонни қамраб олган.

Португалиянинг Возела муниципалитетида 2 июл куни бошланган ёнғинни бартараф этиш учун 1 200 нафар ўт ўчирувчи, 400 та махсус техника ва 15 та ёнғин ўчирувчи самолёт жалб қилинган. Ёнғин майдони 12 минг гектарга етган.

3 июл куни Испания Португалияга ёрдам сифатида 120 нафар ўт ўчирувчи ва 45 та махсус техника юборган. 5 июл ҳолатига кўра, ёнғиннинг асосий ўчоқлари назоратга олинган бўлса-да, айрим ҳудудларда ёнғинлар ҳали ҳам давом этаётгани хабар қилинмоқда.

Мутахассислар қайд этишича, Европадаги ўрмон ёнғинларининг кучайиши июн ойида кузатилган экстремал иссиқ ҳаво тўлқини билан боғлиқ бўлиб, юқори ҳарорат ва қурғоқчилик ёнғинларнинг тез тарқалишига шароит яратган.