Оролдаги артемия цисталарини йиғиш учун квоталар E-auksion орқали берилади

Квоталарни E-auksion орқали сотишдан келиб тушган маблағларнинг камида 50 фоизи Мўйноқ тумани ва қолган қисми бошқа туманлардаги экологик муаммоларни ҳал этишга йўналтирилади.

“Орол денгизидаги артемия цисталарини йиғиш тизимини такомиллаштириш чора-тадбирлари тўғрисида”ги ҳукумат қарори лойиҳаси эълон қилинди.

Шундай тартиб ўрнатиладики, унга мувофиқ 2024 йил 1 январдан бошлаб, Орол денгизидаги артемия цисталарини йиғиш учун квоталар E-auksion электрон савдо платформаси орқали берилади.

E-auksion электрон савдо платформасида онлайн-аукционни ташкил этиш ҳамда ўтказиш тартиби Вазирлар Маҳкамаси қарори билан тасдиқланган E-auksion электрон савдо платформасида электрон онлайн-аукцион ва танловларни ташкил этиш ҳамда ўтказиш тартиби тўғрисида низом асосида амалга оширилади.

Белгиланишича:

Экология, атроф муҳитни муҳофаза қилиш ва иқлим ўзгариши вазирлиги томонидан артемия цисталарини йиғишга доир рухсатнома берилади;
Орол денгизидаги артемия цисталарини йиғиш ишлари календар йилининг 16 июл–31 март муддатларида амалга оширилади;
ҳар йили апрел–май ойларида Орол денгизининг акваторияси қирғоғида артемия цисталарининг захира миқдори аниқланади;
Экология, атроф муҳитни муҳофаза қилиш ва иқлим ўзгариши вазирлиги томонидан артемия цистасини йиғишга доир квота тасдиқланади.

Белгилаб ўтилишича, Қорақалпоғистон Республикаси Вазирлар Кенгашининг маҳаллий бюджетига артемия цисталарини йиғиш учун квоталарни E-auksion электрон савдо платформасида онлайн-аукцион орқали сотишдан келиб тушган маблағларнинг камида 50 фоизи Қорақалпоғистоннинг Мўйноқ тумани ва қолган қисми бошқа туманлардаги экологик муаммоларни ҳал этишга йўналтирилади.