Европарламент Россия алюминийсига эмбарго жорий этиши мумкин

Россияга қарши навбатдаги жазо чоралари «Росатом» давлат концерни, шунингдек, «Арктик СПГ 2» суюлтирилган газ ишлаб чиқариш, сақлаш ва жўнатиш заводини қураётган компанияларга таъсир қилиши керак, деди сешанба куни Европарламентнинг Россия бўйича доимий маърузачиси Андрюс Кубилюс.

Еврокомиссия ва ЕИ кенгаши вакиллари иштирокида Европа Иттифоқининг Россияга қарши санкциялари самарадорлигига бағишланган парламент муҳокамасида у, шунингдек, Россия алюминий ва ядро ёнилғисига эмбарго жорий этишга чақирди. «Россия бу урушни молиялашда давом эта олиши ёки аксинча бўлиши бизга боғлиқ», - деди Европарламент депутати. 

Россия иқтисодиёти санкциялардан Европа Иттифоқи кутганидек зарар кўрмади, деди Белгия парламенти депутати Катлин ван Бремпт. «Бизнинг санкцияларимиз биз ўйлаганчалик самарали эмас. Санкциялар рўйхатидаги кўплаб товарлар ҳали ҳам Россияга боряпти ва Россия ҳарбий иқтисодиётига киряпти», деди у. Ван Бремптнинг таклифи Европа Иттифоқининг Россияга қўшни давлатлар ва унинг санкцияларни четлаб ўтаётган иттифоқчиларига, шунингдек, Россияга етказиб бериш тақиқланган товарларни у ердан экспорт қилишда давом этаётган Европа Иттифоқи компанияларига нисбатан дипломатик саъй-ҳаракатлари ва босимини кучайтиришдан иборат. 

У Европарламентда биринчи бўлиб рус олмосларига эмбарго қўйишга чақирди. Бир неча ой ўтгач, 11 октябр куни Белгия Европа Иттифоқи билан биргаликда Россия олмосларига қарши санкциялар ишлаб чиқаётганини эълон қилди. «Биз Россия олмосларини чакана бозорларимиздан бутунлай узиб қўймоқчимиз. Бунинг энг яхши йўли тўлиқ кузатув тизимини яратишдир», - деди бош вазир Александр Де Кроо. Унинг қўшимча қилишича, Белгия бу тизимни G7 давлатлари билан биргаликда ишлаб чиқмоқда ва якунлаш арафасида. Мақсад 2024 йил 1 январгача бунга эришиш. 

Европа Иттифоқининг санкциялар воситаси самара бермаяпти

Босимни кучайтириш, кўпроқ санкциялар жорий этиш, бўшлиқларни ёпиш керак, деди немис депутати Сергей Лагодинский. Аммо, унга кўра, буни «Россия давлатини тийиб туриш орқали Украинага ёрдам беришнинг аниқ мақсади билан» ҳамда шаффоф ва профессионал стратегия доирасида қилиш керак.

У Европа Иттифоқига шахсий буюмларни олиб киришни тақиқловчи жазо чораларини танқид қилди. «Бизнинг устувор вазифамиз Россия ҳукумати ва рус аппаратини урушни давом эттириш имкониятидан маҳрум қилишдир. Европа комиссиясининг санкциялар бўйича талқини, унга кўра, россиялик диссидентлар ўзларининг шахсий нарсаларини - шампун, совунни Россиядан олиб кела олмайди - очиғини айтганда, бизнинг санкциялар воситамиз - ташқи сиёсатимизнинг энг муҳим воситаларидан бири - самара бермаяпти ва бу ўз-ўзини масхара қилиш». Парламент аъзосининг тан олишича, ҳатто ўзи ҳам ЕИ санкциялари қандай жорий этилиши, бекор қилиниши ва амалга оширилиши ҳақида ҳалигача аниқ тушунчага эга эмас. 

Ўн битта санкциялар тўплами 

ЕИ аллақачон Украинага қарши тажовузкорлик учун Россияга қарши ўн битта санкция пакетини киритган, охиргиси 23 июн куни ЕИ кенгаши томонидан маъқулланган. 8 сентябр куни Брюссел ўз веб-сайтидаги савол-жавоблар бўлимига Европа Иттифоқи мамлакатлари томонидан ушбу санкцияларни қўллаш ҳақида қўшимча қилди: «Европа Иттифоқига импортни тақиқлаш XXI иловасига киритилган товарларни Европа Иттифоқига олиб кириш мумкин эмаслигини билдиради». Ушбу иловадаги рухсат этилган товарлар рўйхатига нафақат автомобиллар, балки, масалан, чамадон ва саёҳат сумкалари, аёллар ва болалар кийимлари, пойабзал, смартфонлар ва ҳар қандай телефонлар, гигиена воситалари киради.

Европа комиссияси вакили чегарада бошқа товарларга автомобиллар каби қаттиқ муносабатда бўлмаслик кераклигини таъкидлади. «Чегарани кесиб ўтаётган одам кийган кийим Европа Иттифоқи санкцияларини четлаб ўтишга қаратилган бўлиши қийин, - деди у DW мухбирининг саволига жавоб бериб. - Бу қиммат машинага қараганда бутунлай бошқача ҳолат ва Европа Иттифоқига аъзо давлатлар санкцияларни қўллашда буни ҳисобга олиши керак».