Путин Россия Қуролли Кучлари ҳарбий хизматчилари сонини оширди

Россия Қуролли Кучлари сонининг ортиши таҳдидларнинг кучайиши, жумладан, НАТО кенгайиши билан боғлиқ.

Фото: Сергей Чевалков

Россия президенти Владимир Путин Россия Қуролли Кучларининг штат сонини белгилаш тўғрисидаги фармонни имзолади.

Унга кўра, Россия Қуролли Кучларининг штат сони 2 209 130 бирликни, шу жумладан 1 320 000 ҳарбий хизматчини ташкил қилади. Фармон имзоланган кундан (1 декабр) бошлаб кучга кирди.

Россия ҳукуматига Мудофаа вазирлигини ушбу фармонни амалга ошириш учун зарур бўлган бюджет маблағлари билан таъминлаш топширилди.

Ўз навбатида, Россия Мудофаа вазирлиги Қуролли Кучлар сонини 170 минг ҳарбий хизматчига кўпайтириш тўғрисидаги фармон муносабати билан сафарбарликни амалга ошириш режалаштирилмаганига аниқлик киритди.

Ҳарбий департамент фуқароларни мажбурий ҳарбий хизматга чақиришни сезиларли даражада ошириш режалаштирилмаганини қайд этди.

Россия Қуролли Кучлари ҳарбий хизматчилари сонини кўпайтириш шартнома бўйича ҳарбий хизматни ўташ истагини билдирган фуқаролар ҳисобидан босқичма-босқич амалга оширилади.

Россия Мудофаа вазирлигининг хабар беришича, Россия Қуролли Кучлари сонининг ортиши таҳдидларнинг кучайиши, жумладан, НАТО кенгайиши билан боғлиқ.

#Владимир Путин #Россия #Қуролли Кучлар