Рамзон Қодиров асирга олинган украиналиклар эвазига оиласи ва отларидан санкцияларни олиб ташлашни сўради 

Россия таркибига кирувчи Чеченистон Республикаси раҳбари Рамзон Қодиров асирга олинган украиналик аскарларни озод қилиш эвазига, оила аъзолари ва отларига нисбатан жорий қилинган санкцияларни олиб ташлашни таклиф қилди. 

Бу ҳақда у Грознийга келган собиқ америкалик разведка ходими ва Ироқ оммавий қирғин қуролларини йўқ қилиш жараёнини назорат қилиш бўйича БМТ собиқ инспектори Скотт Риттер билан учрашувда айтди. 

«Бизда Донецк ва Луганскда қўлга олинган асирлар бор. Мен меҳмонимизга [ҳарбий асирлар рўйхатини] бераман. Агар улар мендан эмас, балки бегуноҳ одамлар - онамдан, қизларимдан, шунингдек, отларимдан санкцияларни олиб ташласа, у ҳолда биз бу асирлардан воз кечамиз», деди Қодиров. 

Риттерга асирга олинган украиналикларнинг видеоси ҳам намойиш этилган. Унда асирлардан бири Қодировнинг қариндошлари, самолётлари ва отларига нисбатан санкцияларни бекор қилишни, бунинг эвазига 20 нафар асир озод этилишини айтган. 

«Агар сиз ушбу шартларни бажарсангиз, 20 нафар украиналик аскар ўз уйига қайтади», деди видеода ҳарбий асирлардан бири. 

2023 йил 24 август куни АҚШ Рамзон Қодировнинг онаси Аймани Қодировага қарши санкциялар жорий қилди. Шундан сўнг Қодиров ижтимоий тармоқда онаси «фақат хайрия фаолияти билан шуғулланаётгани», буни «бутун дунё билишини» айтиб, видеомурожаатни жойлади. Шунингдек, санкция олиб ташланмаса, «кечирмаслиги» билан таҳдид қилди ва «қўлидан келган ҳамма ишни қилишини» айтди. 

2022 йил 15 сентябрда Қўшма Штатлар Украинадаги уруш туфайли Қодировнинг ўзига, шунингдек, унинг уч хотини ва уч қизига қарши санкциялар киритди. АҚШ расмийлари Қодировни қийноқлар ва қотилликларга алоқадор «шафқатсиз қўмондон» деб атаган. АҚШ Молия вазирлиги, шунингдек, у чеченларни Украинадаги урушга сафарбар қилишда иштирок этганини ва Бучада чечен жангчилари ишлаганини таъкидлаган.