Қўшма Штатлар Hennesea Holdings ва унинг 17 та танкерини Россия нефти «нарх чегараси»га риоя қилмагани учун санкциялар рўйхатига киритди.
АҚШ Молия вазирлиги Бирлашган Араб Амирликларининг Hennesea Holdings юк ташиш компанияси ва унинг 17 та танкерини Россия нефтини бир баррел учун 60 доллардан белгиланган нархга риоя қилмасдан ташигани учун санкция рўйхати (Special Designated Nationals List, SDN-List)га киритди.
18 январ, пайшанба куни АҚШ Молия вазирлигининг Хорижий активларни назорат қилиш бошқармаси (OFAC) томонидан эълон қилинган пресс-релизда айтилишича, қуйидаги кемалар чекловларга дучор бўлган: Aristo, Hai II, HS Arge, HS Buraq, HS Esberg, HS Everett, HS Glory, HS Legend, HS Star, La Pride, Mona, Nellis, Osperous, Peria, Sara II, Sensus, Uze. Уларнинг барчаси Либерия байроғи остида ҳаракатланади, Hennesea Holdings оператори билан боғланган.
«2022 йил охирида ташкил этилган «нарх шифти» кучга киришидан бир оз олдин, Hennesea компанияси эски танкерларни сотиб олди, улар ҳозирда Россия нефти ва нефть маҳсулотларини ташимоқда. Hennesea компаниясига тегишли танкерлар қайта-қайта Россия портларига киряпти», - дейилади Америка Молия вазирлиги ҳисоботида.
Агентлик маълумотларига кўра, Hennesea HS Atlantica танкерининг якуний бенефициари бўлиб, у 2023 йил 1 декабрда Россия нефтини баррелига 60 доллардан юқори нархда ташигани учун санкциялар рўйхатига киритилган. «Бугунги ҳаракатлар яна бир бор кўрсатиб турибдики, нарх чегарасини бузганлар оқибатларга дучор бўлади, - деди АҚШ молия вазири Уолли Адейемо. - Ҳеч ким бизнинг коалициямизнинг Кремлга ёрдам бераётганларни тўхтатиш қарорига шубҳа қилмаслиги керак».
Россия нефти учун «нарх чегараси»
2022 йил охирида Европа Иттифоқи ва G7 давлатлари (АҚШ, Германия, Япония, Британия, Франция, Италия ва Канада), шунингдек, Австралия Россия нефти учун «нарх чегарасини» келишиб олди ва ўз компанияларига ушбу хомашёни, агар нефт келишилган даражадан юқори нархда сотилса, ташиш, моддий ва транспорт хизматларини кўрсатишни тақиқлади. 2023 йил 5 декабрдан бир баррел учун нарх 60 АҚШ долларини ташкил этади. Чекловлардан мақсад - Москванинг нефт даромадларини камайтириш.
Ўз навбатида, Россия агар шартномаларда «нархлар чегараси» шарти мавжуд бўлса, ўз компанияларига нефт сотишни тақиқлади. Нефт маҳсулотлари нархига нисбатан чеклов 2023 йил 5 февралдан кучга кирди. Енгил нефт маҳсулотлари учун «нарх шифти» бир баррель учун 100 долларни, оғир нефт маҳсулотлари учун бир баррель учун 45 долларни ташкил қилади.
