Дорилар истеъмоли билан боғлиқ хавфларни тезкор аниқлаш ва чора кўришга қаратилган тизим ташкил этилади

Президент Шавкат Мирзиёев фармацевтика соҳасини тартибга солиш, аҳолини сифатли ва хавфсиз дори воситалари билан таъминлаш масалалари бўйича йиғилиш ўтказди.

31 январ куни президент Шавкат Мирзиёев ҳузурида фармацевтика соҳасини тартибга солиш масалалари муҳокама қилинди.

23 январ куни «Фармацевтика соҳасини тартибга солиш бўйича қўшимча чора-тадбирлар тўғрисида» президент фармони қабул қилинган эди. Унга кўра, дорилар ва тиббий буюмларни тайёрловчи ҳамда сотувчи ташкилотлар бу маҳсулотларнинг сифати ва хавфсизлиги учун ҳам масъул этиб белгиланди. Шундан келиб чиқиб, уларга нисбатан давлат назоратини амалга оширишнинг алоҳида қоидалари ўрнатилади.

Дори воситалари истеъмоли билан боғлиқ хавфларни тезкор аниқлаш ва чора кўришга қаратилган тизим ташкил этилади. Бунинг учун «Зарур фармакологик назорат амалиёти – GVP» стандарти жорий этилиб, Соғлиқни сақлаш вазирлигида дориларнинг ножўя таъсири тўғрисида электрон база шакллантирилади. Бу ҳақдаги маълумотларни тиббиёт ходимлари ва аҳолига тезкор етказиш йўлга қўйилади.

Дорилар ва тиббий буюмларни сақловчи божхона ва эркин омборлар босқичма-босқич «Зарур сақлаш амалиёти – GSP» қоидалари талабларига мувофиқлаштирилади. Фармацевтика тармоғини ривожлантириш агентлиги ҳузуридаги «Зарур амалиётлар маркази» давлат корхонаси сифатида қайта ташкил этилади.

Телерадиоканаллар орқали дорилар ва биологик фаол қўшимчаларни реклама қилиш Соғлиқни сақлаш вазирлигида ташкил этиладиган махсус кенгашнинг хулосаси асосида мумкин бўлади.

Давлат раҳбари бу тармоқнинг аҳоли саломатлиги ва иқтисодиётдаги аҳамиятини таъкидлаб, фармон ижросини самарали ташкил этиш бўйича қўшимча кўрсатмалар берди.