12 феврал куни Тошкентнинг икки туманида газ вақтинча ўчирилади

Фото: Kun.uz

Тошкент шаҳар Сергели-8а мавзесидаги ерости газ қувурларини қайта қуриш ишлари амалга оширилиши муносабати билан Сергели ва Янгиҳаёт туманларининг қуйидаги ҳудудларига 12 феврал куни соат 10:00 дан 17:00 га қадар табиий газ етказиб бериш вақтинча тўхтатилади. Бу ҳақда «Ҳудудгазтаъминот» АЖ матбуот хизмати хабар берди.

Ушбу ҳудудлар:

Сергели тумани

Аҳоли истеъмолчилари: «Соҳибкор», «Янги Сергели», «Эзгулик», «Мададкор», «Зийрат», «Меҳригиё», «Ўзгариш», «Ҳабибий», «Саховат», «Қипчоқ», «Нурҳаёт», «Иттифоқ», «Нилуфар» МФЙларидаги 347 та кўп қаватли уйлардаги 18 953 та хонадон;
«Дарё бўйи», «Софдил», «Сўғдиёна» МФЙларидаги 4072 та ерли хонадон.

Янгиҳаёт тумани

Аҳоли истеъмолчилари: «Йўлдош», «Машъал», «Янги турмуш», «Олчазор», «Хушнуд», «Навқирон», «Ёрқин ҳаёт», «Чорагон», «Чорбоғ», «Виктор», «Ал-Фарғоний», «Дўстлик», «Иқбол», «Тошкент», «Файзли» МФЙлар кўп қаватли уйларидаги 12 559 та хонадон ва 3711 ерли хонадон.

«Таъмирлаш ишлари тугатилгандан сўнг табиий газ таъминоти қайта тикланади», дейилади хабарда.