Путин «чет эл агентлари» ресурсларида рекламани тақиқлади

Президент имзолаган қонун, шунингдек, ОАВ ва интернетда «чет эл агентлари»нинг ўз ресурсларини реклама қилишни ҳам тақиқлайди. Давлат думаси спикери Володин рекламани тақиқлаш «чет эл агентлари»ни реклама даромади 80 фоизидан маҳрум қилади, деб умид қилмоқда.

Фото: Евгений Разумный / Ведомости

Россия президенти Владимир Путин РФ фуқаролари ва компанияларига «чет эл агентлари» ресурсларида – улар веб-сайтларида, ижтимоий тармоқларида, блогларида ва бошқа платформаларида реклама жойлаштиришни тақиқловчи қонунни имзолади. Шунингдек, оммавий ахборот воситаларида ва интернетда «чет эл агентлари»нинг ўз ресурсларини реклама қилиш тақиқланди. Президент имзолаган ҳужжат 11 март, душанба куни норматив-ҳуқуқий ҳужжатлар порталига жойлаштирилди.

Илгари қонун Федерация кенгаши ва Давлат думаси томонидан бир овоздан маъқулланган. Россиянинг «чет эл агентлари» тўғрисидаги қонунларида фуқаролар учун 50 минг рублгача ва юридик шахслар учун 500 минг рублгача жарима ва жиноий жазо - икки йилгача қамоқ назарда тутилган.

«Чет эл агентлари»да рекламани тақиқловчи қонун

«Чет эл агентлари»да рекламани тақиқловчи қонун лойиҳаси 15 феврал куни Давлат думасига киритилган бўлиб, уни 395 депутат, жумладан, спикер Вячеслав Володин ва фракция раҳбарлари қўллаб-қувватлаган. Володиннинг таъкидлашича, тақиқ ҳар қандай платформага - ҳам веб-сайтларга, ҳам ижтимоий тармоқларга тааллуқли. Давлат думаси хавфсизлик қўмитаси раҳбари Василий Пискаревнинг таъкидлашича, «Реклама тўғрисида»ги қонунга киритилган ўзгартиришлар реклама мақсадида «чет эл агентлари» ресурсларига гиперҳаволалар жойлаштиришни тақиқлайди. Шу билан бирга, улардан ҳали ҳам керакли белгилар кўрсатилган ҳолда иқтибос келтирилиши мумкин.

Вячеслав Володиннинг таъкидлашича, рекламани тақиқлаш «чет эл агентлари»ни реклама даромади 50-80 фоизидан маҳрум қилади. Унинг сўзларига кўра, гап 5 миллиард рубл ҳақида кетяпти. Унинг таъкидлашича, қонун кучга киришидан олдин ҳам «ўз самарадорлигини кўрсатди». «Баъзилар аллақачон лойиҳа ёпилганини эълон қилди, бошқалари таҳририятлари ходимларини қисқартирмоқда», деб тушунтирди Володин. Шунингдек, у муаллифлик ҳуқуқи ва турдош ҳуқуқлар учун «чет эл агентларига» пул тўлашни тақиқлашни таклиф қилди.

Давлат думаси «чет эл агентлари»да рекламани тақиқлашни маъқуллаганидан сўнг, «Скажи Гордеевой» YouTube-канали бошловчиси Катерина Гордеева лойиҳа ишни тўхтатганини эълон қилди. Кўп ўтмай Гордеева лойиҳани давом эттириш учун маблағ тўплашини билдирди. Журналист Алексей Пивоваров янги қонун туфайли у «Редакция» лойиҳаси учун масъул бўлган жамоанинг «катта қисми билан хайрлашишга» мажбур бўлганини эълон қилди.