Хотин-қизларнинг тадбиркорлиги учун 100 млн доллар миқдорда имтиёзли маблағ ажратилади

Хотин-қизларни касбга ўқитиш ва бандлигини таъминлаш, уларни тадбиркорликка кенг жалб этиш учун Тикланиш ва тараққиёт жамғармаси ҳисобидан 2 йиллик имтиёзли давр билан 5 йил муддатга йиллик 14 фоиз ставкада жами 100 млн АҚШ доллари эквивалентида ресурслар ажратилади, бунда:

• "Халқ банки"га 35 млн АҚШ доллари;
• "Бизнесни ривожлантириш банки"га 35 млн АҚШ доллари;
• "Микрокредитбанк"га 30 млн АҚШ доллари ажратилади.

 
Савдо-саноат палатаси ва учта банкда қуйидагиларни назарда тутувчи хотин-қизлар тадбиркорлигини қўллаб- қувватлаш тизими яратилади:

• ташаббускор хотин-қизларнинг бизнес лойиҳаларини ишлаб чиқишга кўмаклашиш;
• маҳаллаларда хотин-қизларни тадбиркорликка ўқитиш;
• хотин-қизлар томонидан тайёрланган маҳсулотларни сотиш;
• кооперация асосида лойиҳаларни амалга оширишга кўмаклашиш;
• лойиҳалар амалга оширилишини кузатиб бориш ва аёл тадбиркорлар билан доимий мулоқот қилиш.

 
Даромад топишга қаратилган муайян меҳнат фаолияти билан шуғулланиш ва фаолият турини кенгайтириш истагини билдирган хотин-қизларни қўллаб-қувватлаш дастури ишлаб чиқилади.

Кредит ажратишда устуворлик "Ижтимоий ҳимоя ягона реестри" ахборот тизимига, "Аёллар дафтари", "Ёшлар дафтари" ва "Темир дафтар"га киритилган хотин-қизлар томонидан амалга ошириш таклиф этилаётган лойиҳаларга берилади.