Уларга консуллик-ҳуқуқий ёрдам кўрсатилгани, озиқ-овқат маҳсулотлари тарқатилгани таъкидланмоқда.
16 апрел куни Бирлашган Араб Амирликларида кучли жала қуйиши, сув тошқини юз бериши оқибатида Дубай халқаро аэропорти ўз фаолиятини вақтинча тўхтатган эди. Шу сабабли, аэропортда қолиб кетган Ўзбекистон фуқароларига консуллик-ҳуқуқий ёрдам кўрсатилди, озиқ-овқат маҳсулотлари тарқатилди.
Қайд қилинишича, «Дубай – Тошкент» йўналиши бўйича парвозни амалга ошириши керак бўлган Centrum Air авиакомпанияси самолёти парвози ноқулай об-ҳаво шароити туфайли бекор қилинган. Оқибатда Ўзбекистоннинг 52 нафар фуқароси 1 кун давомида Дубай халқаро аэропортининг кутиш залида қолиб кетган.
Таъкидланишича, ҳамюртларни Ўзбекистонга қайтариш билан боғлиқ масалаларни ҳал этиш мақсадида Ўзбекистон Бош консулхонаси, Uzbekistan Airways ва Centrum Air авиакомпаниялари вакиллари Дубай халқаро аэропорти мутасаддилари билан учрашув ўтказган. Ўзбекистонликлар 17 апрел куни Uzbekistan Airways самолёти билан ватанга қайтган.
